काठमाडौं । वरिष्ठ अधिवक्ता शम्भु थापाले १४९ सांसदले दाबी पेश गरेपछि सरकार बनाउन कसैले रोक्न नसक्ने बताएका छन् ।
प्रतिनिधिसभा विघटन विरुद्ध संवैधानिक इजलासमा बहस गर्दै वरिष्ठ अधिवक्ता थापाले १४९ सांसदको दावी पेश गरेपछि राष्ट्रपतिले त्यसलाई रोक्न नसक्ने बताएका हुन् । बहुमत सांसदको हस्ताक्षरलाई नमानेर राष्ट्रपति विद्यादेवी भण्डारीले मतदानको अधिकार खोसेको थापाले बताए ।
हु आर यू भन्दै थापाले प्रश्न गरे, ‘१४९ को दाबा पेस गरेपछि तपाईं को हो एमालेका यतिले मत हाल्न सक्दैनन्, माओवादीका यतिले मत हाल्न सक्दैन भन्ने ?, हाम्रो मतदानको अधिकार खोस्ने ?’ उनले भने।
थापाले जनताको प्रतिनिधिलाई सरकार बनाउन कसैले रोकन नसके जिकिर गरे । उनले विश्वासको मतको आधार फ्लोर टेष्ट भएको तर्क पेश गरे । ‘प्रधानमन्त्रीले विश्वासको मत प्राप्त गर्न नसकेपछि पदमुक्त हुनुपर्दैन ? थापाले भने, ‘विश्वासको मतबाट बाहिर गएपछि उहाँलाई अब ७६ को उपधारा ५ अनुसार दाबी गर्ने अधिकार छैन ।’
थापाले यो मुद्दाको फैसलामा इजलासले सांसदहरूको मतदानको अधिकारको बारेमा बोल्ने आफुले अपेक्षा गरेको बताए । थापाले बहस गरेसँगै आजको सुनुवाइ सकिएको छ । थापाले बहस गर्नुअघि देउवाको पक्षबाट चार जना अधिवक्ताले बहस गरेका थिए । मुद्दामा भोलि पनि निरन्तर सुनुवाइ हुनेछ ।
प्रतिक्रिया