कोपा अमेरिका : बोलिभियालाई हराउँदै उरुग्वे अन्तिम आठमा प्रवेश

काठमाडौं । उरुग्वेले कोपा अमेरिका फुटबलमा पहिलो जित निकालेको छ । पहिलो जितसहित उरुग्वे अन्तिम आठमा प्रवेश गरेको छ ।

शुक्रबार विहान सम्पन्न खेलमा उरुग्वेले बोलिभियालाई २-० गोल अन्तरले पराजित गरेको हो ।

उरुग्वेको जितमा एडिनसन कभानीले एक गोल गरेका थिए भने एक गोल बोलिभियाका कार्लोस लाम्पेले आत्मघाती गोल गरेका थिए । यो जितपछि उरुग्वे नकआउट चरणमा पुगेको छ ।

उरुग्वेको ३ खेलमा एक जित, एक बराबरी र एक हारसहित ४ अंक भएको छ । त्यस्तै बोलिभियाको भने यो लगातार तेस्रो हार हो । समुह ए मा रहेको उरुग्वेसहित यस समूहबाट अर्जेन्टिना, चिली पनि नकआउट चरण अर्थात क्वाटरफाइनलमा पुगिसकेका छन् ।

त्यस्तै समुह बि बाट भने अहिलेसम्म ब्राजिल र कोलम्बिया क्वाटरफाइनलमा पुगेका छन् । प्रतियोगिता अन्तरगत अहिले चिली र पाराग्वेबीचको खेल जारी छ । कुल दश टिम सहभागी प्रतियोगिता दुई समूहमा विभाजित छन् ।