कोरोना विरुद्धको चिनियाँ ‘भेरोसेल’ खोपको दोस्रो डोज असार २२ देखि लगाइने

काठमाडौं । कोरोना भाइरस विरुद्धको चिनियाँ भेरोसेल खोप लगाएकालाई असार २२ गतेदेखि दोस्रो मात्रा लगाइने भएको छ ।

गत जेठ २५ गतेदेखि २९ गतेसम्म खोप पहिलो डोज खोप लगाएका नागरिकलाई असारको अन्तिम साता दोस्रो डोज खोप लगाइने भएको हो । स्वास्थ्य सेवा विभागको खोप शाखाका अनुसार ३ लाख ७० हजार नागरिकले भेरोसेलको पहिलो डोज खोप लगाएका छन् ।

चिनियाँ राष्ट्रपति सी चिङफिङले घोषणा गरेअनुसार चीन सरकारबाट अनुदानमा प्राप्त १० लाख डोज खोपमध्ये सरकारले ६० वर्षदेखि ६४ वर्ष उमेर समुहका नागरिकलाई खोप लगाइएको थियो । भेरोसेलको पहिलो डोल लगाएको चार हप्तामा दोस्रो डोज लगाउनुपर्छ ।

अनुदानमा प्राप्त चिनियाँ खोप सरकारले दोस्रो डोज समेत लगाउन पुग्ने गरी अड्कलेर लगाएको थियो । यसअघि भारतीय कोभिसिल्ड खोप तत्कालै आइहाल्छ भन्ने भ्रममा झण्डै १७ लाख पहिलो डोज खोप लगाईंदिँदा स्टक अभावका कारण झण्डै साढे १३ लाख जेष्ठ नागरिकले दोस्रो डोज खोप लगाउन पाएका छैनन् ।