काठमाडौं । नेपाली कांग्रेसको महाधिवेशनको तिथि निश्चित भएसँगै पार्टीभित्रको राजनीतिक सरगर्मी दिनदिनै बढिरहेको छ ।
कांग्रेसका दोस्रो पुस्ताका नेतात्रय विमलेन्द्र निधि, सशांक कोइराला र प्रकाशमान सिंहबीच भएको छलफल लगत्तै वरिष्ठ नेता रामचन्द्र पौडेलले आफु निटक नेताहरुसँग छलफल गरेका छन् ।
काठमाडौंको बसुन्धरास्थित एक पार्टी प्यालेसमा आयोजित पौडेल समुहको छलफलमा आसन्न महाधिवेशनको तयारी नीति र नेतृत्वबारे छलफल भएको छ । कांग्रेसको महाधिवेशन आगामी भदौ १६ देखि १९ गतेसम्म काठमाडौंमा हुँदैछ ।
महाधिवेशनमा आफ्नो समुहबाट सभापतिमा उम्मेदवारी दाबी गरेका पौडेलले आफु निकट नेताहरुको समर्थनको खोजी गरेका छन् । तर, पौडेल समुहबाटै महामन्त्री शशांक कोइराला, प्रकाशमान सिंह, सुजाता कोइराला, शेखर कोइराला लगायतका नेताहरुले पनि सभापतिको दाबेदारी गरिरहेका छन् ।
छलफलमा पौडेलसहित महामन्त्री डा. शशांक कोइराला, कोषाध्यक्ष प्रकाशमान सिंह, सीतादेवी यादव, शेखर कोइराला लगायतका नेता सहभागी छन् । यसैगरी रामशरण महत, अर्जुननरसिंह केसी, मिनेन्द्र रिजाल, सुजाता कोइराला, दिलबहादुर घर्ती, हृदयराम थानी, गगन थापा, प्रदीप पौडेल, धनबहादुर गुरुङ, कल्याण गुरुङ, बद्री पाण्डे, गुरु घिमिरे, जीवन परियार र कमला पन्त उपस्थित छन्।
प्रतिक्रिया