काठमाडाैं । चेक रिपब्लिक युरोपेली च्याम्पियनसिप २०२० काे क्वाटरफाइनलमा पुगेकाे छ ।
हंगेरीकाे पुस्कास एरिनामा आइतबार राति भएकाे अन्तिम १६ काे खेलमा नेदरल्याण्ड्सलाई २-० ले पराजित गर्दै चेक क्वाटरफाइनलमा पुगेकाे हाे ।
अब चेकले क्वाटरफाइनलमा डेनमार्कको सामना गर्नेछ । डेनमार्कले शनिबार वेल्समाथि ४-० को जित दर्ता गर्दै क्वाटरफाइनलमा स्थान पक्का गरेको थियो ।
चेकका लागि टोमस होलेस र प्याट्रिक शिकले एक/एक गाेल गरे। पहिलो हाफमा गोलको थुप्रै अवसर सिर्जना गरेको नेदरल्याण्ड्सले दोस्रो हाफको सुरुवातमै डिफेन्डर म्याथिस डी लिग्टलाई गुमाएको थियो ।
डच टोली १० खेलाडीमा समेटिएपछि चेकले दबाब सिर्जना गर्दै दुई गोल गर्न सफल भयो । ५५ औं मिनेटमा टोलीका मुख्य डिफेन्डर लिग्टले हातले बल रोकेपछि भिडियो असिस्टेन्ट रेफ्री (भीएआर)को सहायता लिँदै रेफ्रीले रातो कार्ड दिएका थिए ।
उनले पेनाल्टी क्षेत्रभित्र लडेपछि शिकलाई राेक्ने क्रममा हातले बल रोकेका थिए ।
६८ औं मिनेटमा चेक रिपब्लिकले होलेसको गोलमार्फत् अग्रता लियो । कर्नरमा टोमस कालासले दिएको हेडर पासलाई फार पोस्टमा अनमार्क रहेका होलेसले हेडरमार्फत् सहजै गोल गरे ।
८० औं मिनेटमा चेक रिपब्लिकले अग्रता दोब्बर बनायाे । होलेसले पेनाल्टी क्षेत्रको बायाँ भागबाट दिएको पासलाई शिकले पहिलो टचमा नै गोल गर्दै चेकलाई क्वाटरफाइनल पुर्याए । उनको जारी प्रतियोगितामा यो व्यक्तिगत चौथो गोल हाे ।
प्रतिक्रिया