काठमाडौं । राष्ट्रिय स्वतन्त्र पार्टी (रास्वपा)की नेतृ तथा चितवन क्षेत्र नम्बर ३ की उम्मेदवार सोविता गौतम आदिवासी जनजाति समुदायप्रति दिएको भनिएको अभिव्यक्तिका कारण विवादमा परेकी छन्।
चुनावी सभामा बोल्ने क्रममा गौतमले ‘आदिवासी जनजाति पैसामा बिक्ने’ भन्ने आशय व्यक्त गरेको आरोप लगाउँदै नेपाल आदिवासी जनजाति महासंघ, जिल्ला परिषद् सचिवालय चितवनले कडा आपत्ति जनाएको छ।
महासंघले जारी गरेको विज्ञप्तिमा गौतमको अभिव्यक्तिलाई आदिवासी समुदायको स्वाभिमान र राजनीतिक चेतनामाथिको आघातका रूपमा व्याख्या गरिएको छ। विज्ञप्तिमा भनिएको छ कि यस्तो टिप्पणीले वर्षौंदेखि आफ्नो पहिचान र अधिकारका लागि संघर्षरत समुदायको मानमर्दन मात्र नभई उनीहरूको विवेक र चेतनामाथि गम्भीर प्रहार गरेको छ।
महासंघले सम्बन्धित अभिव्यक्तिप्रति सार्वजनिक रूपमा माफी माग्न माग गर्दै त्यसो नगरे उम्मेदवार गौतमविरुद्ध चुनावी बहिष्कारसहित आन्दोलनका कार्यक्रम अघि बढाउने चेतावनी दिएको छ।
विज्ञप्तिमा चितवन क्षेत्र नम्बर ३ का सम्पूर्ण संयन्त्र परिचालन गरी आवश्यक कदम चालिने उल्लेख गरिएको छ।
प्रतिक्रिया