काठमाडौं । नेकपा एमालेको केन्द्रीय कमिटी बैठक सुरु भएको छ ।
प्रधानमन्त्री निवास बालुवाटारमा एमालेको १३औं केन्द्रीय कमिटी बैठक बसेको हो ।
सर्वोच्च अदालतले दशौं महाधिवेशन आयोजक कमिटीलाई मान्यता नदिएपछि गत बिहीबार बसेको सोही कमिटीकै बैठकको निर्णयका आधारमा आज केन्द्रीय कमिटी बैठक बोलाइएको हो ।
बैठकको अध्यक्षता गर्दै अध्यक्ष केपी शर्मा ओलीले पार्टीमा विभाजन ल्याउन हजार प्रयत्न भैरहेको बताएका छन् ।
पार्टीलाई २०७५ जेठ २ गतेअघिको संगठनात्मक प्रणालीमा लैजानुपर्ने माग गर्दै आएको माधवकुमार नेपाल पक्ष भने आजको बैठकमा अनुपस्थित भएको छ । तर उपाध्यक्ष वामदेव गौतम भने बैठकमा सहभागि भएका छन् ।
नेपाल पक्ष निकट स्थायी कमिटी सदस्यहरुको बैठकले आज बोलाइएको बैठक पनि अवैध भएको भन्दै उपस्थित हुन अस्वीकार गरेको हो । नवौं महाधिवेशनबाट निर्वाचित कमिटीलाई भंग गरी अध्यक्ष ओलीले आफु निकट केन्द्रीय सदस्यहरुको बैठकबाट थप गरेका सदस्यहरुको बैठक २०७५ जेठ २ अघिको नभएर २०७७ फागुन २८पछिको बैठक भएको नेपाल पक्षको जिकिर रहेको छ ।
ओली पक्षले भने यो बैठक नेपाल पक्षले माग गर्दै आएको जेठ २ को कमिटीको बैठक भएको दाबी गरेको छ ।
प्रतिक्रिया