ओली र नेपालको रिस नथामिएसम्म एमालेमा एकता सम्भव छैन : वामदेव गौतम

काठमाडौं । नेकपा एमालेका उपाध्यक्ष बामदेव गौतमले पार्टी अध्यक्ष केपी ओली र वरिष्ठ नेता माधवकुमार नेपालको रिस शान्त नभएसम्म पार्टी एकता संभव नहुने बताएका छन् ।

राष्ट्रियसभाको बैठकपछि सञ्चारकर्मीसँग कुरा गर्दै उपाध्यक्ष गौतमले अध्यक्ष ओली र वरिष्ठ नेता नेपाल एकअर्कोसँग रिसाएको बताए । दुवै नेताको रिस नथामिएसम्म दोस्रो तहका नेताको प्रयासले सार्थकता नपाउने गौतमले बताए ।

गौतमले आफु पार्टीको एकता गर्नुपर्छ भन्ने उद्देश्यले नै अहिले ओलीतिर लागेको बताउँदै अब दुवै नेताको रिस घटाउने प्रयासमा जुटेको दाबी गरे । गौतमले अदालतको फैसलापछि एमालेको एकता ठीक ठाउँमा आउने दाबी पनि गरे ।

‘अहिले हाम्रो पार्टीमा माधव, झलनाथ एकातिर केपी एकातिर हुनुभयो । पार्टी एकता गराउनकै निम्ति भनेर म केपी ओलीतिर लागेको छु’, गौतमले भने, ‘माधव कमरेड धेरै रिसाउनुभएको छ केपी ओली जी संग, केपी ओली पनि माधवसित बेस्सरी रिसाउनु भएको छ । यी दुईटाको रिस नमर्दासम्म उहाँहरुको मातहतमा रहेका साथीहरुको पनि चिन्ताले काम लाग्नेवाला छैन । म यी दुवै नेताको रिसलाई कसरी शिथिल बनाउन सकिन्छ, त्यतातिर लागिरहेको छु । ”

गौतमले एमालेमा एकता सम्भव रहेको विश्वास व्यक्त गरे । अदालतको निर्णयपछि एकता हुनेमा आफु विश्वस्त रहेको उनले बताए ।