काठमाडौं । देशभर मनसुनी वायुको प्रभाव आज पनि कायमै छ । आजको मौसम सामान्यदेखि पूर्ण बदली भएको छ । काठमाडौं उपत्यकालगायत देशका विभिन्न भागमा आज रातिदेखि लगातार वर्षा भइरहेको छ ।
प्रदेश १, २, बागमती, गण्डकी र लुम्बिनी प्रदेशका धेरैजसो स्थान र सुदूरपश्चिम तथा कर्णाली प्रदेशका केही स्थानमा ठूलो वर्षा हुने जल तथा मौसम विज्ञान विभागले जनाएको छ ।
लगातारको वर्षाका कारण आएको पहिरोले नारायणगढ मुग्लिन सडकखण्ड र भीमदत्त राजमार्ग अवरुद्ध भएको छ । पहिरोका कारण सयौं यात्रु बाटोकै अलपत्र परेका छन् । त्यस स्थानमा पहिरो पन्छाएर बाटो खुलाउने कार्य भइरहेको प्रहरीले जनाएको छ ।
प्रदेश १, २, बागमती, गण्डकी र लुम्बिनी प्रदेशका धेरैजसो स्थान र सुदूरपश्चिम तथा कर्णाली प्रदेशको पहाडी भू-भागमा भू-क्षय, पहिरो तथा गेग्रान बहावको जोखिम रहेको विभागको अनुमान रहेको छ ।
नदीनाला तथा खहरे खोलाहरुमा पानीको सतह बढ्न सक्ने तथा दैनिक जीवन र यातायात क्षेत्र प्रभावित हुन सक्ने भएकाले आवश्यक सतर्कता अपनाउन जल तथा मौसम विज्ञान विभागले आग्रह गरेको छ ।
प्रतिक्रिया