बालुवाटार छोड्नुअघि प्रधानमन्त्री ओलीले देशबासीका नाममा सम्बोधन गर्ने
खबर कुरा
काठमाडौं । सर्वोच्च अदालतको फैसलापछि पदबाट हट्न बाध्य प्रधानमन्त्री केपी शर्मा ओलीले बालुवाटार छोड्नुअघि देशबासीका नाममा सम्बोधन गर्नेभएका छन् ।
सर्वोच्चले शेरबहादुर देउवालाई प्रधानमन्त्रीमा नियुक्त गर्न राष्ट्रपतिका नाममा परमादेश जारी गरेपछि प्रधानमन्त्री ओली स्वतः बर्हिर्गमनमा परेका ओलीले आफ्ना कुरा सबैलाई सुनाएर बालुवाटार छोड्न लागेका हुन् ।
ओली र उनको पार्टी नेकपा एमालेले सर्वोच्चको फैसलाप्रति असन्तुष्टि जनाए पनि त्यसलाई सम्मान गर्ने जनाएका छन् । एमालेले फैसला कानूनी र संवैधानिक नभए राजनीतिक उद्देश्ययुक्त भएको टिप्पणी गरिसकेको छ ।
दिउँसो २ बजे गर्ने सम्बोधनमा प्रधानमन्त्री ओलीले आफ्नो कार्यकालमा भएका राम्रा कामको फेरि एकपटक व्याख्या गर्ने भएका छन् । उनले आफुलाई कसरी र किन पदबाट हटाइयो भन्ने बारेमा पनि जानकारी गराउने भएका छन् ।
साँझ ५ बजे शेरबहादुर देउवालाई प्रधानमन्त्रीमा नियुक्त गर्न राष्ट्रपति कार्यालयले तयारी गरिसकेको छ । प्रधानमन्त्री ओलीले त्यसअघि नै सम्बोधन गरेर बालुवाटारस्थित प्रधानमन्त्री निवास छोड्न लागेका हुन् । ओली आजै आफ्नो निजी निवास भक्तपुरको बालकोट सर्ने भएका छन् ।
ओलीले दिउँसो २ बजे देशबासीका नाममा सम्बोधन गर्नेभएपछि आजे दिउँसो १ बजेदेखि बालुवाटारमै बोलाईएको स्थायी कमिटी बैठक स्थगित गरिएको छ ।
