काठमाडौं । सर्वोच्च अदालतको परमादेशमा संविधानको ७६(५) बमोजिमको प्रधानमन्त्री नियुक्त भएका शेरबहादुर देउवा शपथका लागि शीतलनिवास पुगेका छन् ।
राष्ट्रपति जारी गरेको विज्ञप्ति नसच्चिएसम्म सपथ नलिने अडान लिएका देउवा संविधानको धारा ७६ को (५) अनुसार नियुक्त गर्ने नयाँ पत्र आउने प्रतिवद्धता पाएपछि देउवा शपथका लागि शीतलनिवास पुगेका हुन् ।
यसअघि राष्ट्रपति विद्यादेवी भण्डारीले प्रधानमन्त्री नियुक्त गर्दै जारी गरेको विज्ञप्तिमा सर्वोचचको परमादेश अनुसार नियुक्त गरिएको भन्ने वाक्यप्रति देउवाले आपत्ति जनाएका थिए ।
आफू नेपाली काँग्रेसको संसदीय दलको नेताको रुपमा प्रधानमन्त्री नभएको र धारा ७६ (५) अनुसार नियुक्त हुनुपर्ने भन्दै देउवाले असहमति जनाएका थिए । देउवाले शीतलनिवासमै गठबन्धनका नेताहरूसँग छलफल गरेका छन् ।
साँझ ६ बजे शपथग्रहणको कार्यक्रम राखिए पनि विज्ञप्तिबारे विवाद भएपछि ढिला गरेर शपथग्रहण हुन लागेको हो । शीतलनिवासमा सपथ ग्रहण समारोहमा भाग लिन पूर्वप्रधानमन्त्रीहरू, कांग्रेस र माओवादीका नेताहरू उपस्थित भएका छन् ।
देउवाले आजै सानो आकारको मन्त्रिमण्डल गठन गर्ने तयारी गरेका छन् । अहिलेसम्ममा काँग्रेसबाट बालकृष्ण खाँण र माओवादी केन्द्रबाट जनार्दन शर्मा र पम्फा भुसाल मन्त्री बन्ने भएका छन् ।
प्रतिक्रिया