काठमाडौं । निवर्तमान प्रधानमन्त्री केपी शर्मा ओलीले बालुवाटारस्थित प्रधानमन्त्रीको सरकारी निवास छोडेका छन् ।
ओली बालुवाटार छोडेर भक्तपुरको बालकोटस्थित आफ्नै निजी निवासमा सरेका छन् । ओलीले बालुवाटार छोड्नु अघि उनलाई लिन दर्जनौं चारपांग्रे र दुईपांग्रे सवारी साधनसहित एमाले नेता कार्यकर्ताहरु बालुवाटारमा भेला भएका थिए ।
मोटरसाइकल र गाडीको लस्करसहितका एमाले नेता कार्यकर्ताले ओलीलाई बालुवाटारबाट स्कर्टिङ गरेका छन् ।
एमालेले दुई दिनअघि मात्र ब्यूँताएको युथ फोर्सले ओलीलाई बालकोटसम्मै स्कर्टिङ गर्ने र भक्तपुरको कौशलटारबाट भव्य नागरिक अभिनन्दन गर्ने बताएको थियो । एमालेका नेता महेश बस्नेतले ओलीलाई स्वागत गर्न सडकमा आउन आफ्ना समर्थकहरुलाई आह्वान गरेका थिए ।
बालुवाटारदेखि भक्तपुरसम्मको सडकमा एमाले नेता कार्यकर्ताहरुको सवारीसाधनसहित बाक्लो उपस्थित हुनेभएपछि ट्राफिक व्यवस्था मिलाउन सयौं सुरक्षाकर्मी परिचालन गरिएको छ ।
गत सोमबार सर्वोच्च अदालतले शेरबहादुर देउवालाई संविधानको धारा ७६ ५ अनुसार प्रधानमन्त्रीमा नियुक्त गर्न परमादेश जारी गरेसँगै ओली पदबाट स्वतः बर्खास्तीमा परेका थिए । ओलीले मंगलबार देशबासीका नाममा सम्बोधन गर्दै अदालतको फैसलाप्रति असन्तुष्टि जनाएका थिए ।
प्रतिक्रिया