काठमाडौं । बिहीबार तीन शीर्ष कम्युनिष्ट नेताहरुबीच भेटर्वार्ता भएको छ ।
नेकपा माओवादी केन्द्रका अध्यक्ष पुष्पकमल दाहाल प्रचण्ड, नेकपा एमालेका वरिष्ठ नेता माधवकुमार नेपाल र नेकपाका महासचिव नेत्रविक्रम चन्दबीच भेटवार्ता भएको हो ।
महासचिव चन्द नेता नेपाललाई भेट्न उनकै निवास कोटेश्वर पुगेका थिए । उनीसँग नेता धर्मेन्द्र बाँस्तोला पनि नेपाल निवास पुगेका थिए ।
पछि माओवादी अध्यक्ष प्रचण्ड पनि नेपाल निवास पुगेका थिए । तीन शीर्ष नेताहरुको बीचमा पछिल्लो राजनीतिक घटनाक्रमका विषयमा छलफल भएको छ । भेटमा प्रचण्डले बृहत कम्युनिष्ट एकताको प्रस्ताव गरेका छन् ।
चन्दले अघिल्लो सरकारसँग आफुहरुले गरेको सहमतिबारे फेरि पनि चासो राखेका छन् । सहमति अनुसार अझै पनि जेलमा रहेका सयौं नेता कार्यकर्ताको रिहाई नभएकोमा गुनासो गर्दै आएका छन् ।
यसअघि बुधबार चन्दले प्रचण्डसँग खुमलटारमा भेट गरेका थिए । चन्दले माओवादी शक्तिहरुबीच पुनः एकीकरणको प्रस्ताव समेत गरेका छन् । प्रचण्डले पहिलेदेखि नै यसबारेमा प्रयास गर्दैआएका थिए । एमालेमा रहेर पनि विद्रोहीको अवस्थामा रहेका माधव नेपालसँग प्रचण्ड र चन्दको भेटलाई अर्थपूर्ण रुपमा हेरिएको छ ।
प्रतिक्रिया