काठमाडौं । समाचार एजेन्सी राष्ट्रिय समाचार समिति (रासस)का वरिष्ठ कार्यकारी सम्पादक एकराज पाठक राससको प्रधानसम्पादकमा नियुक्त भएका छन् ।
हालै दशौँ तहमा बढुवा भएका पाठकलाई रासस सञ्चालक समितिले राससको विनियमअनुसार यही साउन १ गतेबाट लागू हुनेगरी प्रधानसम्पादकमा नियुक्त गरेको हो ।
पाठक हाल कर्मचारी प्रतिनिधिका रुपमा राससको सञ्चालक समितिका सदस्य छन् । उनी हाल राससको आलेख शाखाको प्रमुखका रुपमा कार्यरत छन् ।
विसं २०३१ फागुनमा बागलुङमा जन्मिएका पाठक विसं २०५६ मा समाचारदाताका रुपमा रासस प्रवेश गरेका थिए । उनीसँग विश्वविद्यालयमा आमसञ्चार तथा पत्रकारिता विषय अध्यापनको अनुभव छ । पाठकले सूचनाको हक र पत्रकारिता विषयमा विभिन्न पुस्तक लेखेका छन् ।
पाठकले यसअघि राससको उपप्रमुख समाचारदाता, अन्तर्राष्ट्रिय समाचार डेस्कको प्रमुख तथा प्रदेश समन्वय विभाग प्रमुखका रुपमा रहेर काम गरेका छन् ।
प्रतिक्रिया