बुटवल । रुपन्देही जिल्लामा साउन १ र २ गते संञ्चालन भएको कोरोना बिरुद्धको खोप अभियानमा ४५ हजार बढीले खोप लगाएका छन । स्वास्थ्य कार्यालय रुपन्देहीका अनुसार जिल्लाका १६ पालिकाका ९२ खोप केन्द्रहरुबाट ४५ हजार २७६ जनाले कोरोना बिरुद्धको चाईनिज खोप भेरोसेल लगाएका हुन् ।
कार्यालयका अनुसार २ दिनमा सबै भन्दा बढी बुटवल उपमहानगरमा १२५ प्रतिशतले खोप लगाएका छन् भने सबै भन्दा कम मर्चवारी गाँउपालिकामा ६६ प्रतिशत मात्र लक्षित समुह खोप लगाउन आएका छन् । स्वास्थ्य कार्यालयले रुपन्देहीमा ४६ हजार ४५१ जनालाई खोप दिने लक्ष्य बनाएकोमा ४५ हजार २७६ जनाले खोप लगाएका हुन् ।
खोप अभियान अन्तर्गत ५५ वर्ष र सो माथिका उमेर समुहका कोभिड विरुद्ध पहिलो मात्रा खोप लगाउन बाँकी सबै नागरिकहरू, विश्वविध्यालय, विध्यालयका प्राध्यापक, शिक्षक र कर्मचारीहरु, सार्वजनिक यातायातमा कार्यरत चालक र सहचालकहरु र नेपाल सरकारले तोकेका अत्यावश्यक सेवामा संलग्न खोप लगाउन बाँकी व्यक्तिहरु, खोप अनिवार्य गरेका देशमा जाने नेपाली नागरिकहरुलाई साउन १ गतेबाट पहिलोमात्र भेरोसेल खोप लगाउन शुरु गरिएको स्वास्थ्य कार्यलय रुपन्देहीका प्रमुख डा. राजेन्द्र गिरीले बताए ।
स्वास्थ्य कार्यालयले साउन ४ गते सार्वजानिक यातायातका चालक तथा सहचालकहरुलाई खोप दिने कार्यक्रम बनाएको छ ।
स्थानीय पालिकाहरुले खोप केन्द्रहरुमा राम्रो व्यवस्थापन गर्न नसक्दा रुपन्देहीका कतिपय खोप केन्द्रहरुमा प्रहरीले सामान्य बल समेत प्रयोग गर्नु परेको थियो ।
प्रतिक्रिया