प्रतिगमनकारीको खड्क प्रहारबाट मुर्छित संसद ब्युँतियो : बाबुराम भट्टराई

काठमाडौं । जनता समाजवादी पार्टीका संघीय परिषद् अध्यक्ष डा.बाबुराम भट्टराईले प्रतिगमनकारीको खड्ग प्रहारबाट मुर्छित बनेको प्रतिनिधिसभा र मुर्छित बनेका सांसदहरु फेरि ब्युँतिएको बताएका छन् ।

प्रतिनिधिसभा बैठकलाई सम्बोधन गर्दै अध्यक्ष भट्टराईले खड्ग प्रहारबाट मुर्छित प्रतिनिधिसभा ब्यूँतिएपछि पुन सदनमा उपस्थित हुन पाउनु खुसीको कुरा भएको बताए ।

भट्टराईले भने ‘प्रतिगमनकारीहरुको पटक पटकको खड्ग प्रहारपछि मुर्छित बनेको प्रतिनिधिसभा र दुई पटक मुर्छित बनाइएका हामी यहाँ उपस्थित हुने अवसर प्राप्त गरेका छौं, त्यसको लागि आवाज उठाउने सबैमा धन्यवाद ज्ञापन गर्न चाहन्छु ।’

भट्टराईले आफ्नो पार्टीभित्रको विवादका कारण देशमा संकट आइलागेको जिकिर गरे । उनले भने ‘हामी अभागीलाई खाने बेलामा रिस उठ्यो,’ उनले भने, ‘हामी एकढिक्का भएको भए हामी जनता समाजवादी पार्टी आफैंले निकास दिन सक्थ्यौं, हामी आपसमा झगडा गर्न थाल्यौं, फेरि हाम्रा साथीहरु ठीक ठाउँमा आउनुभयो ।’