काठमाडौं । प्रधानमन्त्री शेरबहादुर देउवाले विश्वासको मत प्राप्त गरेका छन् ।
प्रतिनिधिसभाको बैठकमा भएको मतदानमा प्रधानमन्त्री देउवाले विश्वासको मत प्राप्त गरेका हुन् ।
देउवाको पक्षमा १६५ मत आएको छ भने विपक्षमा ८३ मत मात्र परेको छ । तटस्थमा १ मत मात्र परेको छ । प्रतिनिधिसभाका हाल कायम रहेका २७१ सदस्यहरुमध्ये जम्मा २४९ मत खसेको थियो । २१ जना सांसद अनुपस्थित रहे ।
विश्वासको मत हासिल गर्न १३६ मत भए पुग्छ ।
देउवालाई उनको दल नेपाली कांग्रेस, नेकपा माओवादी केन्द्र, जनता समाजवादी पार्टी जसपा, राष्ट्रिय जनमोर्चाले पुरै मतदान गरेका छन् ।
यसैगरी नेकपा एमालेको माधवकुमार नेपाल पक्षका केही सांसद र ओली पक्षका केही सांसदले समेत देउवालाई मतदान गरेका छन् ।
संविधानको धारा ७५ को उपधारा ५ अनुसार राष्ट्रपति समक्ष दाबी पेश गर्दा देउवाको पक्षमा १४९ जना सांसदको समर्थन रहेको थियो । तर, सो दाबीलाई राष्ट्रपतिले अस्वीकार गर्दै संसद नै विघटन गरेपछि त्यसको विरुद्धमा १४६ जना सांसदहरुले सर्वोच्च अदालतमा शशरीर उपस्थित भएर रिट निवदेन दर्ता गराएका थिए ।
देउवाले प्रधानमन्त्रीमा नियुक्त भएको एक साता नवित्दै र पुनर्स्थापित प्रतिनिधिसभाको पहिलो दिनको दोस्रो बैठकमै विशाल मतका साथ विश्वासको मत हासिल गरेका छन् ।
प्रतिनिधिसभाको अर्को बैठक साउन ८ गते शुक्रबार बस्ने भएको छ ।
प्रतिक्रिया