काठमाडौं । नेपाली कांग्रेसले १४औं महाधिवेशनमा हुने मतदानमा डिजिटल प्रविधि प्रयोग गर्ने भएको छ ।
कोरोना महामारीको संक्रमण नरोकिएका कारण कांग्रेसले महाधिवेशनमा डिजिटल भोटिङ गर्ने भएको हो । कांग्रेसको केन्द्रीय सूचना, सञ्चार तथा प्रचार विभागको तेस्रो पूर्ण बैठकले डिजिटल भोटिङमार्फत नेतृत्व चयन गर्ने व्यवस्था गरेको हो ।
बैठकले आगामी दिनमा समेत प्रयोग गर्न मिल्ने गरी डिजिटल भोटिङको अवधारणालाई अन्तिम रुप दिन लागेको छ । बैठकले जिल्ला जिल्लामा डिजिटल भोटिङको नमुना प्रदर्शनी गर्ने र प्रविधि संचालनका लागि प्रशिक्षण र सहजीकरण गर्न दक्ष इन्जिनियरहरुको नेटवर्क तयार गरेको जनाइएको छ ।
आगामी भदौमा हुने महाधिवेशन भौतिक रुपमै गर्न खोजेको कांग्रेसले महामारी नरोकिए डिजिटल माध्यमबाट भोटिङ गरी देशभरको नेतृत्व चयन गर्न सक्ने गरी प्रविधिको विकास र सुनिश्चित गरेको विभागका सचिव दिनेश थापा मगरले बताएका छन् ।
जसअनुसार ७७ जिल्ला पार्टी कार्यालयमा उपस्थित भएर प्रदेश अधिवेशन र महाधिवेशनका प्रतिनिधिले प्रविधिमार्फत केन्द्र र प्रदेशको निर्वाचन सम्बन्धी सबै प्रक्रिया पुरा गर्न सक्नेछन् । आउने दिनमा पनि यो प्रविधि प्रयोग गर्न मिल्ने गरी पार्टीले प्रविधिको सुरक्षा गर्ने विभागले जनाएको छ ।
प्रतिक्रिया