लण्डन । बेलायतमा अध्यापनरत प्राध्यापक डाक्टर सूर्यप्रसाद सुवेदीले नेपाल ल क्याम्पसलाई पुस्तक र १ लाख नगद सहयोग प्रदान गर्ने घोषणा गरेका छन् ।
बेलायतमा विगत ३० वर्षदेखि अन्तर्राष्ट्रिय कानून र मानवअधिकार विषयको प्राध्यापन गर्दै आएका प्राडा सुवेदीले आफूले प्रकाशन गरेका र विद्यार्थी जीवनदेखि सङ्ग्रह गरिएका अन्तर्राष्ट्रिय कानून र मानवअधिकारसम्बन्धी पुस्तकसहित दश लाख रुपैयाँ नेपाल ल क्याम्पसलाई प्रदान गर्ने घोषणा गरेका हुन् ।
बेलायतको हल विश्वविद्यालयबाट स्नातकोत्तर तहमा विशिष्ट श्रेणीमा प्रथम हुनाका साथै अक्सफोर्ड विश्वविद्यालयबाट विद्यावारिधि र महाविद्यावारिधिको उपाधि हासिल गरेका सुवेदीले अध्ययन तथा प्राध्यापनका क्रममा सङ्कलन गरेका र आफैद्वारा प्रकाशित पुस्तक सुवेदी आफैले कानूनमा स्नातक गरेको उक्त क्याम्पसलाई दिने निधो गरेका हुन्। उनले ती सबै पुस्तक आफ्नै खर्चमा नेपाल पठाउने पनि जानकारी दिए ।
लिड्स, लण्डन र अक्सफोर्डलगायत संसारका सातवटा विश्वविद्यालयमा प्राध्यापन गर्नुभएका प्रा सुवेदीको निजी सङ्कलनमा रहेका अन्तर्राष्ट्रियस्तरका यस्ता ग्रन्थले नेपालका वर्तमान र भावी पुस्ताका छात्रछात्रा लाभान्वित हुने भएका छन् । सुवेदीले प्रदान गर्ने दश लाख रुपैयाँ नेपाल ल क्याम्पसको मुद्दती खातामा जम्मा गरी त्यसको वार्षिक ब्याजबाट प्रत्येक वर्ष उक्त क्याम्पसको पुस्तकालयमा नयाँ–नयाँ ग्रन्थ थप्दै जाने व्यवस्था पनि गरिएको छ । प्राज्ञिक उन्नयनमा सघाउन अमूल्य सहयोग प्रदान गरेको भन्दै क्याम्पस पधाधिकारीले प्राडा सुवेदीलाई धन्यवाद दिएका छन् ।
प्रतिक्रिया