काठमाडौं । सरकार गठन भएको झण्डै डेढमहिनापछि गण्डकी प्रदेश सरकारले पूर्णता पाएको छ । मुख्यमन्त्री कृष्णचन्द्र नेपाली पोखरेलले मन्त्रिपरिषद् विस्तार गरेका हुन् । शुक्रबार कांग्रेस र माओवादी केन्द्रबाट ६ जना मन्त्रीहरुले सपथ लिएका छन् ।
शुक्रबार दिउँसो प्रदेश प्रमुख सीताकुमारी पौडेलले नवनियुक्त मन्त्रीहरुलाई सपथ गराएकी छिन् । कांग्रेसबाट आन्तरिक मामिला तथा कानूनमन्त्रीमा विन्दुकुमार थापा, भौतिक पूर्वाधार, सहरी विकास तथा यातायात मन्त्रीमा कुमार खड्का, शिक्षा, संस्कृति, विज्ञात तथा सामाजिक विकासमन्त्रीमा मेषलाल श्रेष्ठ र पर्यटन, उद्योग, वाणिज्य तथा आपूर्ति मन्त्रीमा मणिभद्र शर्माले शपथ लिएका छन् । यसअघि शिक्षा मन्त्रीको जिम्मेवारी सम्हालेका खड्कालाई भौतिक पूर्वाधार, सहरी विकास तथा यातायातमन्त्रीको जिम्मेवारी दिइएको हो ।
यसैगरी माओवादी अर्थमन्त्रीमा रामजी बराल, वन, वातावरण तथा भूसंरक्षण मन्त्रीमा दीपक चर्ती मगर र भूमि व्यव्स्था, कृषि सहकारी तथा गरिबी निवारण मन्त्रीमा चन्द्रबहादुर बुढाले शपथ लिएका छन् ।
यसअघि कांग्रेसबाट कुमार खड्का, माओवादी केन्द्रबाट मधुमाया अधिकारी र जनता समाजवादी पार्टीबाट हरिशरण आचार्य र स्वतन्त्र सांसद मन्त्री रहेका थिए । जसपाबाट उर्जा जलस्रोत तथा सिंचाईं मन्त्री बनेका आचार्यले भने यसअघि मुख्यमन्त्रीले गरेको प्रतिवद्धता पुरा नगरेको भन्दै सपथ ग्रहण बहिस्कार गरेका छन् ।
तस्बिर साभार : ताण्डव न्युज
प्रतिक्रिया