जसपा विवाद : ठाकुर पक्षका नेता शरतसिंह भण्डारी भन्छन् – आयोगमा निष्ठाको सनाखत भएको छ

काठमाडौं । जनता समाजवादी पार्टी जसपाको ठाकुर पक्षका नेता शरतसिंह भण्डारीले निर्वाचन आयोगमा निष्ठाको सनाखत भैरहेको बताएका छन् ।

निर्वाचन आयोगमा संचारकर्मीहरुसँग कुरा गर्दै अध्यक्ष महन्थ ठाकुर पक्षका नेता भण्डारीले आयोगमा पार्टीको आधिकारिकता भन्दा पनि निष्ठाको सनाखत भैरहेको बताएका हुन् ।

भण्डारले रातरात नेताहरुले कित्ता परिवर्तन गरेको आरोप लगाए । आफुहरुले सत्यको पक्षमा लागेको दाबी गर्दै उनले पार्टीभित्र दुइटा विचार आउँदा हामीले आयोगमा निष्ठाको सनाखत गराएको बताए ।

भण्डारीले आफुहरुले कुनै गल्ती नगरेकाले आत्मालोचना गर्नुपर्ने कुनै आवश्यकता नरहेको बताए । आयोग परिसरमै अर्का अध्यक्ष एवं कार्यकारिणीमा बहुमत पक्षको नेतृत्वकर्ता उपेन्द्र यादवले महन्थ ठाकुरहरुले आत्मालोचना गरे विचार गर्न सकिने बताएको प्रक्रिया दिँदै नेता भण्डारीले यस्तो बताएका हुन् । भण्डारीले आफुहरुले गरेका सबै काम वैधानिक भएको दाबी गरे । उनले विगतका काममा आफूहरूलाई कुनै ग्लानी नभएको जिकिर गर्दै भने, ‘हामीलाई विगतका काममा कुनै आत्मग्लानी छैन । राज्यसँग आफ्ना माग मुद्दाका आधारमा हिजो सरकारलाई समर्थन गरेका हौं, भोलि पनि देउवालाई मागका आधारमा नै समर्थन गर्ने हो । नयाँ पार्टी बनाउनेबारे निर्वाचन आयोगको निर्णय आएपछि अगाडि बढ्छौं ।’

भण्डारले निर्वाचन आयोगको निर्णयपछि नयाँ पार्टी बनाउने या नबनाउने भन्नेबारे निर्णय गर्ने बताए ।