काठमाडौं । पूर्वसांसद टोपबहादुर रायमाझी र लेखराज भट्ट सहित चार जनाले आफुहरुले नेकपा माओवादी केन्द्र दल त्याग नगरेको जिकिर गरेका छन् । रायमाझी र भट्टसहित प्रभु साह र गौरीशंकर चौधरीले आफुहरुले दल त्याग नगरेको भन्दै प्रतिनिधिसभाको बाँकी कार्यकाल अवधिमा सदस्यकै रूपमा कामकाज गर्न पाउनुपर्ने मागसहित सर्वोच्चमा रिट निवेदन दर्ता गरेका छन् । उनीहरुले पूर्ववत माओवादी केन्द्रको संसदीय दलको सांसद पद कायम राख्न माग गर्दै सर्वोच्च अदालतमा रिट दायर गरेका हुन् ।
२३ फागुनमा सर्वोच्चले एमाले र माओवादी केन्द्र ब्युँताएपछि उनीहरू एमालेमा लागेको भन्दै माओवादी केन्द्रले दल त्याग गरेको कारण देखाएर उनीहरूको सांसद पद खोसेको थियो । पद खोसिएको चार महिनापछि सांसदकै रूपमा पुनर्बहालीको माग गर्दै उनीहरू सर्वोच्च पुगेका हुन् ।
उनीहरूले सर्वोच्चमा दिएको रिट निवेदनमा माओवादी केन्द्रको केन्द्रीय कार्यालय पेरिसडाँडा, माओवादी केन्द्रका अध्यक्ष प्रचण्ड, निर्वाचन आयोग, संसद् सचिवालय तथा प्रतिनिधिसभाका सभामुखलाई विपक्षी बनाउँदै उत्प्रेषणयुक्त परमादेशको माग गरिएको छ।
एमाले नेता टोप बहादुर रायमाझीले सर्वोच्चमा पेश गरेको रिट निवेदनमा आफु एमालेमा औपचारिरुपमा प्रवेश नगरेको उल्लेख गरेका छन् । ‘केपी ओलीले नेतृत्व गरेको नेकपा एमालेमा म औपचारिक रूपमा प्रवेश गरेको छैन । एमालेको पार्टीको सदस्यता लिएको छैन । म एमालेको केन्द्रीय कमिटीमा छैन । नेकपा माओवादी एकता केन्द्रको केन्द्रीय कमिटीमा रहेको छु,’ रायमाझीले निवेदनमा भनेका छन् ।
माओवादी केन्द्रले आफूहरुलाई स्पष्टीकरणको मौकासमेत नदिएको तर स्पष्टीकरणको नक्कली कागजात निर्वाचन आयोगमा बुझाएर पदबाट हटाउने निर्णय गरेको उनीहरूको दाबी छ । सर्वोच्चले उनीहरूको रिट बिहीबारका लागि पेसी ताकेको छ ।
प्रतिक्रिया