काठमाडौं । नेकपा माओवादी केन्द्रले अब ढिलाई नगरी मन्त्रिपरिषद् विस्तार गर्नुपर्ने निर्णय गरेको छ ।
पार्टी केन्द्रीय कार्यालय पेरिसडाँडामा आइतबार बसेको स्थायी समिति बैठकमा अध्यक्ष पुष्पकमल दाहाल प्रचण्डले अहिलेसम्म माधव नेपाल पक्षलाई कुरेको भन्दै अब ढिला गर्न नहुने बताएका छन् । अध्यक्ष प्रचण्डले स्थायी समिति बैठक हुनुअघि एमाले नेता नेपाललाई भेट गरेका थिए ।
त्यसपछि पार्टी बैठकमा प्रचण्डले नेपाल पक्ष सरकारमा आउने सम्भावना नरहेको बताएका छन् । प्रचण्डले पछिल्ला भेटघाट र राजनीतिक घटनाक्रमबारे सदस्यहरुलाई ब्रिफिङ गर्दै नेपाल पक्ष सरकारमा आउने सम्भावना नदेखिएका कारण अब मन्त्रालय बाँडफाँट र मन्त्रिपरिषद् विस्तारबारे प्रधानमन्त्री शेरबहादुर देउवा र उपेन्द्र यादवसँग छलफल गर्नुपर्ने बताए ।
माधव पक्ष सरकारमा आउने नआउने टुंगो नभएका कारण सत्ता गठबन्धनले मन्त्रालय बाँडफाँट टुंग्याउन सकेको छैन । गठबन्धनको अर्को दल जनता समाजवादी पार्टीले पनि सरकारमा कसलाई पठाउने भन्नेबारे कुनै टुंगो लगाइसकेको छैन ।
बैठकपछि संचारकर्मीसँग प्रवक्ता नारायणकाजी श्रेष्ठले नेपाल पक्ष र जसपालाई पर्खिँदा मन्त्रिपरिषद् विस्तार हुन ढिला भएको बताएका छन् । प्रवक्ता श्रेष्ठले अब ढिला नगरी मन्त्रिपरिषद् विस्तार गर्नुपर्ने बताए । मन्त्रिपरिषद् विस्तारबारे आजै अध्यक्ष प्रचण्डले प्रचण्डले गठबन्धनका नेताहरूसँग छलफल गर्ने प्रवक्ता श्रेष्ठले बताए ।
बैठकले भारतीय सुरक्षाकर्मीले दार्चुलास्थित महाकाली नदीमा तुईन काटेर अमानवीय कार्य गरेको ठकर गरेको छ । तुइन काटिँदा वेपत्ता भएका नेपाली युवा जयसिंह धामीबारे सत्यतथ्य छानविन गर्न माओवादीले सरकारसँग माग गरेको छ ।
बैठकले साउन २० गतेका लागि बोलाइएको केन्द्रीय समिति बैठक साउन ३० गते सार्ने निर्णय गरेको छ । सो बैठकअघि ३० गतेभित्र वडास्तरसम्मका पार्टी समिति गठन गरेर त्यसको रिपोर्ट ल्याउन सबै केन्द्रीय सदस्यहरुलाई निर्देशन समेत दिइएको छ ।
माओवादी स्थायी समिति बैठक भोलि दिउँसो ३ बजे पुनः बस्ने भएको छ ।
प्रतिक्रिया