काठमाडौं । नेकपा माओवादी केन्द्रको स्थायी समितिको बैठकले आज पनि मन्त्रिपरिषदमा पठाउने नेताहरको नाम बारे निणय गर्न सकेन । मन्त्रिपरिषदमा पठाउने नेताहरुको टुङ्गो लगाउन बस्ने भनिएको बैठक अन्य ३ विषयमा छलफल गरेर सकिएको बैठकमा सहभागी एक नेताले बताए।
शुक्रबार पार्टी कार्यालय कोटेश्वर पेरिसडाँडामा बसेको माओवादी स्थायी कमिटी बैठकले सत्तारुढ ५ दलीय गठबन्धनको कार्यदलले बनाएको ‘साझा न्युनतम कार्यक्रम’, अव्यवस्थित बसोबासीको समस्या समाधान गर्न अबिलम्ब उच्चस्तरीय आयोग गठबन्धन गर्न माग गर्ने र लुम्बिनी प्रदेशसभा सदस्य विमला वलीको अपहरणबारे विरोध जनाउने निर्णय गरिएको मओवादी पार्टी प्रवक्ता नारायणकाजी श्रेष्ठले जानकारी दिए । सत्ता गठबन्धनको कार्यदलले आजै बालुवाटारमा आफ्नो प्रतिवेदन शीर्ष नेताहरुलाई बुझाएको थियो ।
बैठकले तत्काल गठबन्धनको तर्फबाट तयार गरिएको साझा कार्यक्रम सार्वजनिक गर्न अनुरोध गर्ने निर्णय गर्दै कार्यदललाई साझा कार्यक्रम तयार गरेकोप्रति बैठकले धन्यवाद दिएको प्रवक्ता श्रेष्ठले बताए ।
आजको बैठकमा माओवादीको तर्फबाट सरकारमा सहभागी हुने मन्त्रीहरुको नामका बारेमा निर्णय गर्ने भनिएपनि त्यस सम्बन्धमा छलफल नै नभएको श्रेष्ठले दाबी गरे । माओवादी भित्र मन्त्री बन्ने चाहाना राख्ने र मन्त्री पदको दाबी गर्नेको संख्या धेरै भएपछि शिर्ष नेताहरुलाई नामलाई अन्तिमरुप दिन सकस परेको छ । तर प्रवक्ता श्रेष्ठले भने हालसम्म मन्त्रालयको संख्या र मन्त्रालयको भागबण्डाबारे गठबन्धनमा सहमति जुटिनसकेको कारण पार्टीले कस्लाई पठाउने भन्ने विषयमा छलफल गर्न हतार नगरेको बताए ।
प्रतिक्रिया