एमालेको केन्द्रीय कमिटी संख्या २६०, अद्यावधिक गर्न निर्वाचन आयोगमा पठायो सदस्यहरुको सूची

काठमाडौं । सरकारले राजनीतिक दलविभाजनसम्बन्धी अध्यादेश ल्याएलगत्तै प्रमुख प्रतिपक्षी दल नेकपा (एमाले)ले आफ्ना केन्द्रीय सदस्यहरुको विवरण निर्वाचन आयोगमा अद्यावधिक गर्न पठाएको छ ।

एमालेले मंगलबार २६० सदस्यीय केन्द्रीय कमिटीको सूची निर्वाचन आयोग पठाएको हो । एमालेले केन्द्रीय कमिटीको संख्या र नाम अद्यावधिक गर्न पार्टी निर्णयको आधिकारिक माइन्युटसहित विवरण पेस गरेको छ ।

२०७५ जेठ २ अघिको एमालेको केन्द्रीय कमिटी २०३ सदस्यीय रहेको थियो । तर नेकपा खारेजभएसँगै अध्यक्ष ओली पक्षले केन्द्रीय कमिटीको संख्या २६४ पुर्याएको थियो ।

यसमध्ये केही केन्द्रीय सदस्यको निधन भएको छ भने प्रकाश ज्वालालाई पार्टी सदस्यताबाटै निस्काशन गरेको छ । एमालेले माधवकुमार नेपाललाई समर्थन गर्ने ८ जना समानुपातिक सांसदहरुलाई पनि कारवाही गर्ने तयारी गरेको छ ।