काठमाडौं । माधवकुमार नेपालले नेतृत्व गरेको नेकपा एमाले समाजवादीले पार्टीको प्रस्तावित नाम परिवर्तन गर्नुपर्ने भएको छ ।
सरकारले बुधबार राजनीतिक दल विभाजनसम्बन्धी अध्यादेश जारी गरेसँगै नेता नेपालको नेतृत्वमा एमाले समाजवादी नामको पार्टी दर्ता गर्न निर्वाचन आयोगमा निवदेन दिएपनि नेकपा एमालेसँग मिल्ने भएपछि नाम परिवर्तन गर्नुपरेको हो ।
गत २०७७ फागुन २३ गतेको सर्वोच्च अदालतको फैसलाअनुसार एमाले समाजवादी राख्दा कानूनी अड्चन आउने देखिएपछि नाम परिवर्तन गरेको छ ।
नेपाल पक्षले अब पार्टीको नाम नेकपा एकीकृत समाजवादी राख्नेभएको छ ।
अध्यादेशअनुसार निर्वाचन आयोगले नियमावली संशोधन गरिसकेका कारण नेपालको पार्टी दर्ताको प्रक्रिया छिटो सुरु हुने भएको छ । नामको टुंगो लगाएर पुनः निवेदन दिए वित्तिकै आयोगले दर्ता प्रक्रिया अघि बढाउनेछ ।
अहिले राखिएको नेकपा एमाले समाजवादीको केन्द्रीय कमिटी ९५ जनाको रहेको छ । माधवकुमार नेपाल अध्यक्ष रहेका छन् भने झलनाथ खनाल वरिष्ठ नेता रहेका छन् । तर, यो पार्टीमा राखिएका केही व्यक्तिहरुले भने आफ्नो असहमति राख्दै पछि हटेका छन् ।
उता आफ्नो पार्टीबाट विद्रोह गरी नेपाल पक्षले नेकपा एमाले नाम जुधाएको भन्दै एमालेले निर्वाचन आयोगमा पुगेर आपत्ति जनााएको छ । एमाले नाममा कुनै पनि दल दर्ता नगर्न एमालेले आयोगलाई दबाब दिएको छ ।
प्रतिक्रिया