काठमाडौं । नेकपा एमालेको स्थायी कमिटी बैठकमा उपाध्यक्ष वामदेव गौतम अनुपस्थित भएका छन् । च्यासलस्थित तुल्सीलाल स्मृति प्रतिष्ठानमा जारी बैठकमा नेता गौतम अनुपस्थित भएका हुन् ।
पार्टी विभाजनसँगै गौतम कुन पक्षमा जान्छन् भन्ने विषयमा चर्चा चल्ने गरेको छ । निर्वाचन आयोगमा नयाँ पार्टी दर्ताका लागि निवेदन परेको भोलिपल्ट आफू पक्षका नेताहरुको बैठकमा केपी ओलीलाई साथ दिन नसकिने बताएका थिए ।
त्यसपछि उनी नेपाल नेतृत्वको नयाँ पार्टीतिर खुलेको बताइएको थियो। तर भदौ ६ गते उनको सचिवालयले गौतम एमालेमै रहेको भन्दै सूचना सार्वजनिक गरेको थियो ।
पार्टी विवादमा लामो समयदेखि माधवकुमार नेपाललाई साथ दिँदै आएका स्थायी कमिटी सदस्यहरु पनि आजको बैठकमा सहभागी भएका छन् ।
युवराज ज्ञवाली, भीम रावल, अष्टलक्ष्मी शाक्य, घनश्याम भुसाल, योगेश भट्टराई, गोकर्ण विष्ट, भीम आचार्य, सुरेन्द्र पाण्डे, रघुजी पन्तले सोमबार दिउँसो ओली निवास बालुवाटार पुगेर उनीसँग सहमति गरेका थिए ।
सोही अनुसार उनीहरु बैठकमा सहभागी भएका हुन् । त्यसबाहेक अमृत बोहरा पनि बैठकमा सहभागी छन् । उनी अनुशासन आयोगका अध्यक्ष हुन् ।
आजको बैठकले असार २७ गते भएको १० बुँदे सहमति कार्यान्वयनको मोडालिटी तयार गर्ने बताइएको छ ।
प्रतिक्रिया