सिंह निवास चाक्सीवारीमा पौडेल पक्षका जिल्ला सभापति र नेताहरुबीच छलफल

काठमाडौं । नेपाली कांग्रेसका वरिष्ठ नेता रामचन्द्र पौडेलले आफ्नो समुह निकट जिल्ला सभापतिहरुसँग छलफल गरेका छन् ।

पूर्वमहामन्त्री प्रकाशमान सिंहको निवास ठमेल चाक्सिबारीमा शनिबार बिहान वरिष्ठ नेता पौडेल लगायतका नेताले जिल्ला सभापतिसँग छलफल गरेका हुन् ।

बैठकले आफूहरुले उठाएका विषयको सम्बोधन गर्न सभापति देउवा सकारात्मक भएको निस्कर्ष निकाल्दै अब सबै पाटीं पंक्तिलाई महाधिवेशनमा केन्द्रित गर्ने निर्णय गरेको छ ।

जिल्ला सभापतिहरुको माग पुरा गर्ने विषयमा छलफल केन्द्रित भएको एक नेताले बताएका छन् । यद्यपी, सभापति देउवाले माग पुरा गर्ने बताएपछि जिल्ला सभापतिहरुको रिले अनशन आजबाटै रोकिने भएको छ ।

गत बुधबारदेखि जिल्ला सभापतिहरू पार्टी कार्यालय सानेपामा रिले अनसन बसेका छन्। क्रियाशील सदस्यको नामावली प्रकाशित गर्ने विषयलाई लिएर उनीहरु रिले अनसनमा बसेका हुन् । उनीहरुले निर्वाचन निर्देशन संशोधन गर्नुपर्ने माग पनि राखेका छन्।

आजको छलफलमा नेताहरु प्रकाशनमान सिंह, मिनेन्द्र रिजाल, रामशरण महत, दिलेन्द्रप्रसाद बडुलगायत सहभागि भएका थिए । यस्तै, काठमाडौंका सभापति सबुज बानिँया, धादिङका सभापति रमेश धमला, नुवाकोटका सभापति जगदीश्वरनरसिंह केसी लगायतका सभापतिहरु पनि सहभागि भएका थिए ।

यता, कांग्रेस केन्द्रीय कार्यालयले ४८ जिल्लाका क्रियाशील सदस्यको नाम पार्टी वेबसाइटमा प्रकाशित गरिसकेको जनाएको छ। भदौ १८ गते कांग्रेसले वडा अधिवेशन गर्दैछ ।