काठमाडौं । काठमाडौंका सडकमा थुप्रिएको फोहोर आजबाट उठ्ने भएको छ । एक महिनादेखि थुप्र्रिको फोहोर आजबाट उठाउने सहमति बनेको छ । वर्षाले नुवाकोटको सिसडोलमा फोहोर फाल्न समस्या भएपछि सडकमै थुप्रिएको थियो ।
यससँगै स्थानीय बासिन्दाले पनि फोहोर विसर्जनमा अवरोध गरेका थिए । मंगलबार काठमाडौं महानगरपालिका र ल्यान्डफिल साइट (नुवाकोटको सिसडोल)का बासिन्दबीच सम्झौता भएसँगै अवरोध हट्ने भएको हो ।
काठमाडौं महानगरको वातावरण व्यवस्थापन विभाग र सिसडोलका स्थानीयबीच ९ बुँदे सहमति भएको छ । वातावरण व्यवस्थापन विभागका प्रमुख हरिकुमार श्रेष्ठ, सिसडोल इञ्चार्ज सरकारदीप श्रेष्ठ, महानगरीय प्रहरी बृत्त बालाजुका इञ्चार्ज डीएसपी निर्मल बुढाथोकी र नुवाकोटको ककनी गाउँपालिका-१ का वडाध्यक्ष चन्द्रबहादुर श्रेष्ठ बलामीबीच सहमति भएको हो ।
सहमितमा तीनपिप्ले-सिसडोल सडक तत्काल (१५ दिनभित्र) ग्राभेल गर्ने र कालोपत्रेका लागि लगत्तै टेन्डर प्रक्रियामा जाने सहमति बनेको छ । त्यस्तै, फोहोर ढुवानी गाडीहरुको लिचेड बक्सको व्यवस्था गर्ने तथा तीनपिप्ले-सिसडोल सडक खण्डमा पार्किङ गर्न र ओभरलोड ढुवानी गर्न नपाउने सहमति भएको छ ।
प्रतिक्रिया