नेपाल पक्ष छाडेर एमाले फर्केका नेताहरुलाई रामकुमारी झाँक्रीले लगाईन् युद्ध अपराधीको आरोप

काठमाडौं । नेकपा एकीकृत समाजवादीकी नेतृ रामकुमारी झाँक्रीले नेपाल समुह छाडेर एमाले फिर्ता भएका नेताहरुलाई युद्ध अपराधी र भगौडा जर्नेलको संज्ञा दिएकी छिन् । शनिबार सिन्धुलीमा एकिकृत समाजवादीले आयोजना गरेको कार्यक्रममा बोल्दै नेतृ झाँक्रीले युद्धबाट भाग्नेहरुलाई फेरि ल्याएर कमान्डर बनाउन नसकिने बताएकी हुन् । नेकपा एमालेमा फर्किएका नेतालाई जिम्मेवारी दिन नसकिने झाँक्रीको संकेत थियो ।

‘युद्धबाट भाग्नेहरुलाई फेरि ल्याएर कमान्डर बनाउन सकिँदैन’ कार्यक्रममा उनले भनिन्, -‘युद्धबाट भागेका युद्ध अपराधीजस्तालाई किमार्थ माफी गर्नु हुँदैन । नेतृ झाँक्रीले युद्ध छाडेर भागेकाहरुले सरेन्डर गरे भने भने ढोका खोल्नु पर्ने बताईन् । संसारमा युद्ध अपराधीलाई माफी दिएको तमाम इतिहास भएकाे उदाहरण दिँदै उनले फर्केर आए ढोका बन्द गर्न नहुने बताईन् ।

विगतमा माधवकुमार नेपाल समूहमा रहेका नेताहरु भीम रावल, अष्टलक्ष्मी शाक्य, युवराज ज्ञवाली, घनश्याम भुसाल, योगेश भट्टराई, गोकर्ण विष्ट, भीम रावल, सुरेन्द्र पाण्डे, रघुजी पन्त र अमृतकुमार बोहरा नेकपा एमालेमै फर्केका थिए । एमाले फर्केका नेताहरुले एमालेको विवाद ठुलो भएपनि पार्टी विभाजनकै अवस्थामा पुग्ने विवाद नभएको बताउँदै आएका छन् ।