प्राध्यापक डा. जनार्दन आचार्यको राजनीतिक संस्मरण अव पुस्तकमा

नेपालगन्ज । नेपालगन्जमा रहेर राजनीतिक विश्लेषककारुप चिनिएका राजनीतिशास्त्रका प्राध्यापक डा. जनार्दन आचार्यद्वारा लिखित पुस्तक ‘मेरो आदर्श, मेरो विश्वास’को मंगलवार नेपालगन्जमा विमोचन गरिएको छ । पुस्तक प्रकाशक क्रियटिभ बुक्सले आयोजना गरेको विशेष कार्यक्रममा नेपाल पत्रकार महासंघका अध्यक्ष बिपुल पोखरेल र प्राध्यापक गोविन्द प्रसाद घिमिरेले पुस्तकको विमोचन गरेका हुन् ।

राजनीति, प्राध्यापन र कुटनीतिमा रहेको आफ्नो लामो अनुभव समेटेर डा आचार्यको संस्मरणात्मक पुस्तक ‘मेरो आदर्श, मेरो विश्वास’ मा आचार्यले पञ्चायतकालदेखि बहुदलीय प्रजातन्त्र हुँदै गणतान्त्रिक लोकतन्त्रसम्मको नेपाली राजनीतिका घटनाक्रमलाई मसिनोसँग विश्लेषण गरेका छन् । नेपाली राजनीतिको दुईधारका नायक वीपी कोइराला र पुष्पलाल श्रेष्ठसँगका संस्मरण, उनीहरुको आचरण र व्यवहारलाई प्राध्यापक आचार्यले पुस्तकमा उतारेका छन् ।

लेखक राजनीतिशास्त्रका प्राध्यापकसँगै लामो समय नेपाली कम्युनिष्ट आन्दोलनमा जोडिएका ब्यक्तित्व पनि हुन् । पञ्चायत विरोधी भुमिगत राजनीतिमा कम्युनिष्ट राजनीतिमा लागेका आचार्य एमालेको नेपालगन्जमा आयोजित छैटौं महाधिवेशन देखि राजनीतिबाट अलग रहेर स्वतन्त्र रहँदै आएका छन् ।

डा. आचार्यले लेखेका पुस्तक ‘मेरो आदर्श, मेरो विश्वास’ क्रियटिभ बुक्सले उक्त पुस्तक प्रकाशन गरेको हो । क्रियटिभ बुक्सले यसअघि ओलम्पियन, समृद्धिको बाटो, पाइला–पाइला, शून्यदेखि करोडपतिसम्म, कप्तान १९९८, चौकीदारदेखि वकिलसम्म, क्यान्टोनमेन्ट पुस्तक प्रकाशन गरिसकेको छ । ‘मेरो आदर्श, मेरो विश्वास’ क्रियटिभ बुक्सको आठौं प्रकाशन भएको बुक्सका संस्थापक टिएस ठकुरीले बताए ।