विमानस्थल सुरक्षा व्यवस्थाको धज्जी उडाउँदै गृहमन्त्री खाँण गृह जिल्ला रुपन्देहीमा (फोटो फिचर)

खबर कुरा
१ कार्तिक २०७८, सोमबार
                 

बुटवल । आम नागरिकको सुरक्षाको जिम्मा लिने तथा मुलुकमा नियम कानुनको पालना गराउने जिम्मा पाएका गृहमन्त्री वालकृष्ण खाँण स्वयमले राज्यको नियमनको धज्जी उडाएका छन् । आफु गृह जिल्ला रुपन्देही आउने क्रममा आफ्नो स्वागतका लागि विमानस्थलमा भिड लगाएर गृहमन्त्री खाँणले विमानस्थलको सुरक्षा व्यवस्थाको मात्र धज्जी उडाएका छैनन् की सरकारले आफै जारी गरेको कोरोना संक्रमणबाट बच्न कायम गर्नु पर्ने भौतिक दुरीको समेत हुर्मत लिएका छन् ।

गृहमन्त्री भएपछि पहिलो पटक आज रुपन्देही आएका गृहमन्त्री खाँणलाई स्वागत गर्न रुपन्देहीका काँग्रेस कार्यकर्ताहरु विमानस्थलको सबै सुरक्षा घेरा पार गर्दै रन‍-वेमा नै पुगेका थिए । सर्वसाधारणलाई मेटल डिक्टेक्टर र छामछाम छुमछुम गर्ने सुरक्षाकर्मीहरु गृहमन्त्रीका कार्यकर्ताका अगाडि लाचार जस्तै बनेका थिए । गृहमन्त्री खाँणलाई स्वागत गर्ने नाममा विमानस्थलको सुरक्षा व्यवस्थामाथि ठुलो खेलवाड भएको प्रस्ट देख्न सकिन्थ्यो ।

काँग्रेस कार्यकर्ताहरुले न त विमानस्थलको सुरक्षाको ख्याल राखेका थिए न कोरोना प्रोटोकलको पालना । ‘गृहमन्त्री बनेछि देशको कानुन र आफैले बनाएको मादण्ड पालना गर्न जरुरी नहुने हो ?’ विमानस्थलमा विमान डिले भएपछि झण्डै २ घण्टा कुरेका एकजना यात्रुले टिप्पणी गर्दै थिए ।

यसमा तपाइको मत

Your email address will not be published. Required fields are marked *


*