काठमाडौं । बागमती प्रदेशसभामा एमाले नेतृत्वको सरकारलाई आवश्यक मत नपुग्ने भएपछि एमालेले पार्टी अधिवेशनको बहाना बनाएर संसदमा अनुपस्थित हुने निर्णय गरेको छ । बागमती प्रदेशकी मुख्यमन्त्री अष्टलक्ष्मी शाक्यले संसदको विश्वासको मत प्राप्त गर्नका लागि प्रदेशसभामा प्रस्ताव गरे अनुसार आज १ बजे विश्वासको मत प्राप्त गर्ने प्रयोजनका लागि बैठक बोलाईएकोमा एमालेले पार्टीका वडा अधिवेशनको बहाना बनाएर अनुपस्थित हुने निर्णय गरेको हो ।
एमालेको वडा र पालिका अधिवेशनको तयारी सांसदहरू व्यस्त हुने भएकाले आज बस्ने प्रदेशसभाको बैठकमा एमाले उपस्थित नहुने भएको एमाले बागमती प्रदेश संसदीयदलले जनाएको छ । एमालेले बैठक सार्न हिजो बुधबार नै प्रदेशसभा सचिवालयमा लिखित रूपमा पत्रसमेत दर्ता गराएको थियो । बुधबार नेकपा एमाले बागमती प्रदेशका प्रमुख सचेतक दीपक निरौलाले पार्टीको वडा र पालिका अधिवेशनको सम्पन्न गर्नुपर्ने भएकाले सो कार्यका लागि समय माग गर्दै बैठक सार्न सभामुखसमक्ष लिखित रूपमा पत्र पठाएका थिए ।
एमालेको १० औँ महाधिवेशनको सन्दर्भमा एमालेले कार्तिक ६ देखि ९ गते सम्म वडा तथा पालिका अधिवेशन सम्पन्न गर्ने मिति तोकेको छ । अधिवेशनको तयारी सांसदहरू लाग्नुपर्ने भएकाले प्रदेशसभा बैठकमा उपस्थित नहुने प्रमुख सचेतक निरौलाले बताए ।
गत असोज २४ गते बसेको प्रदेशसभा बैठकमा मुख्यमन्त्री अष्टलक्ष्मी शाक्यले नेपालको संविधानको धारा १८८ को उपधारा २ तथा प्रदेश नियमावली २०७४ को नियम १४३ को उपनियम १ बमोजिम विश्वासको मतसम्बन्धी प्रस्ताव संसद्मा पेस गरेकी थिइन् । आज दिउँसो १ बजेका लागि आह्वान गरिएको प्रदेशसभा बैठकमा मुख्यमन्त्री शाक्यले विश्वासको मत सम्बन्धी प्रस्ताव बारे छलफल र मत विभाजन हुने कार्यक्रम तय भएको थियो ।
एमाले विभाजनलाई समर्थन गर्दे एमालेका १३ सांसदले गत भदौ २५ गते एकीकृत समाजवादी पार्टीको आधिकारिकता र आबद्ध सांसदको नामावलीसहितको निर्वाचन आयोगको पत्र प्रदेशसभा सचिवालयमा दर्ता गराएसँगै मुख्यमन्त्री शाक्य औपचारिक रूपमा अल्पमतमा परेकी थिइन् ।
एमाले विभाज अघि नेपाल पक्षमा रहेकी मुख्यमन्त्री शाक्यले नेपाल पक्षका सांसदहरु हित ५६ जना सांसदका साथ प्रदेश सरकारको मुख्यमन्त्रीमा नियुक्त भएकी थिइन् ।
बागमती प्रदेशसभामा हाल १०९ जना प्रदेशसभा सदस्यहरू मध्ये सरकार बचाउन ५५ सांसदको समर्थन आवश्यकता पर्दछ । प्रदेशसभामा २३ जना नेकपा माओवादी केन्द्र, २२ जना नेपाली काँग्रेस, १३ जना नेकपा एकिकृत समाजवादी, ३ जना विवेकशील साझा, २ जना नेमकिपा, २ जना राप्रपा र १ जना जसपाका सांसद छन् ।
बागमती प्रदेशमा गठबन्धनको सरकार बन्ने निश्चित छ । प्रदेशसभामा गठबन्धनमा आबद्ध माओवादी केन्द्र, नेकपा एकीकृत समाजवादी, काँग्रेस र जसपाका गरी कुल ५८ जना सांसद रहेका छन् । जुन सरकार गठनका लागि स्पष्ट बहुमत हो ।
प्रतिक्रिया