बुटवल । नेकपा एमालेका अध्यक्ष केपी शर्मा ओलीले एमालेले चाहे १ हप्तामा वर्तमान सरकार ढाल्न सक्ने घोषणा गरिरहँदा एमालेकै उपमहासचिव तथा पूर्व अर्थमन्त्री विष्णु पौडेलले एमालेले चाहे वर्तमान सरकारलाई जतिसुकै बेला ढाल्न सक्ने दावी गरेका छन् । एमाले तिलोत्तमाको नगर अधिवेशनमा मंगलबार बोल्दै नेता पौडेलले पाँच दलीय गठबन्धन सरकारलाई पौडेलले तास र बालुुवाको घरको संज्ञा दिए ।
उनले तास र बालुकाको घर जस्तै वर्तमान गठबन्धन सरकार एमालेले जुनसुकै बेला ढाल्न सक्ने दाबी गरे । ‘एमालेले चाहेमा जतिसुकै बेला शेरबहादुर देउवा नेतृत्वको सरकारलाई बदल्न सक्छौं । पौडेलले भने, ( तर, हाम्रो चाहना अहिले सरकार होइन । पार्टीको संगठन निर्माण हो । हाम्रो सम्पूर्ण तागत र क्षमता संगठन निर्माणमा केन्द्रित छ ।’
आफूहरु सिंहदरबारबाट केही महिनाका लागि मात्र बाहिरिएको उल्लेख गई निर्वाचन पछि एमालेलाई सत्तामा आउन कसैले रोक्न नसक्ने बताए । ‘हामी अहिले निर्वाचनमा केन्द्रित छौं । निर्वाचनपछि कसैले चाहेर पनि हल्लाउन नसक्ने एमालेको सरकार बन्छ । स्थानीय, प्रदेश र संघमा एमालेको एकल सरकार बन्छ ।’ पौडेलले भने ।
उनले एमाले विभाजन पूर्व भन्दा झनै शक्तिशाली भएको बताउँदै पार्टी विभाजनले एमालेमा कुनै क्षति नभएको स्पष्ट पारे । एमाले विरुद्ध भइरहेका सबै प्रयासलाई नाकाम तुल्याउने गरी लाग्न कार्यकतालाई निर्देशन दिए । नेता पौडेलले अधिवेशनबाट सर्वसम्मत रुपमा संशक्त टिम चयन गर्न पालिका अधिवेशनका प्रतिनिधिहरुलाई आग्रह गरे ।
प्रतिक्रिया