भीम आचार्यले बुझाए प्रदेश प्रमुखसमक्ष राजीनामा, राजेन्द्र राई नयाँ मुख्यमन्त्री बन्दै

विराटनगर । प्रदेश १ का मुख्मन्त्री भीम आचार्यले राजीनामा दिएका छन् ।

मुख्यमन्त्री आचार्यले प्रदेश प्रमुख सोमनाथ प्यासीलाई आफ्नो राजीनामा पत्र बुझाएका हुन् ।

आचार्यले त्यसअघि आजै बसेको प्रदेशसभा बैठकलाई सम्बोधन गर्दै राजीनामा दिन लागेको जनाएका थिए । मुख्यमन्त्री बनेदेखि नै राजनीतिक रुपमा प्रदेशसभामा अल्पमतमा परेका आचार्यले गत कात्तिक ५ गते विश्वासको मत मागेका थिए । सो सम्बन्धी मतविभाजन आज हुन लागेको थियो । तर, विपक्षी गठबन्धनसँग स्पष्ट बहुमत भएको प्रष्ट भएपछि आचार्यले आज प्रदेशसभामा विश्वासको मतमाथि मतविभाजन हुनुअघि नै राजीनामा दिने घोषणा गरेका हुन् ।

गत भदौ १० गते आचार्यले मुख्यमन्त्री बनेका थिए । नेकपा एमालेमा माधवकुमार नेपाल पक्षधर रहँदै आएका आचार्यले नेपाललाई छोडेर संस्थापन पक्षमा विलय भएपछि तत्कालिन मुख्यमन्त्री शेरधन राईले राजीनामा दिँदै उनलाई मुख्यमन्त्री बनाएका थिए । तर, एमाले विभाजनभएसँगै आचार्यको बहुमत गुमिसकेको थियो । पार्टी विभाजनको असरका कारण आचार्यले ६८ दिनमा सरकारको नेतृत्व छोड्न बाध्य भएका छन् ।

प्रदेश १ मा अब विपक्षी गठबन्धनका तर्फबाट नेकपा एकीकृत समाजवादीका संसदीय दलका नेता राजेन्द्र राई मुख्यमन्त्री बन्ने भएका छन् । गठबन्धनका सांसदहरुको समर्थनमा राईले आजै प्रदेश प्रमुखसमक्ष मुख्यमन्त्रीमा दाबी पेश गर्दैछन् ।