काठमाडौं । सिन्धुलीगढी विजयोत्वस कार्यक्रममा नेकपा एमालेका महासचिव इश्वर पोखरेललाई प्रमुख अतिथि बनाइएपछि सत्तारुढ गठबन्धनले विरोध गर्दा सिन्धुली सदरमुकाम तनाबग्रस्त बनेको छ ।
एमाले र गठबन्धनका कार्यकर्ताहरुबीच झडपको अवस्था सिर्जना भएपछि प्रशासनले सदरमुकाम सिन्धुलीगढीमा निषेधाज्ञा जारी गरेको छ । जिल्ला प्रशासन कार्यालयले हस्पिटल रोड, स्टल बजार, बसपार्क, जुनारचोक, ग्वाङ् खोला पुल क्षेत्रभित्र अहिले बिहान ११ बजेदेखि राति १२ बजेसम्म निषेधाज्ञा जारी गरेको हो ।
एमालेबाट निर्वाचत कमलामाई नगरपालिकाका मेयरले राजनीतिक सहमति विना जिल्लाको महत्वपूर्ण कार्यक्रममा पोखरेललाई प्रमुख अतिथि बनाएपछि दलहरुबीच विवाद चर्किएको थियो । आज सदरमुकाम सिन्धुलीगढीस्थित खेल मैदान नजिकै बाल उद्यान पार्कको उदघाटन गर्ने र बीपी कोइराला एवं पुष्पलाल श्रेष्ठको सालिक अनावरणको कार्यक्रम रहेको छ ।
पोखरेलको विरोधमा गठबन्धनका कार्यकर्ताहरुले कार्यक्रम स्थल वरिपरि घेरा हालेर बसेका छन् । यस्तै ठूलो संखयामा उपस्थित एमालेका युवाहरु पनि जस्तोसुकै अवस्थाको सामना गर्ने भन्दै कार्यक्रमस्थलमा तम्तयार अवस्थामा रहेका छन् । दुई पक्षबीच तनाब बढ्ने अवस्था देखिएपछि प्रशासनले निषेधाज्ञा लगाएको हो । लोकतान्त्रिक चोकमा रहेको वाल उद्यान पार्कमा ठूलो संख्यामा सुरक्षाकर्मी परिचालन गरिएको छ ।
प्रतिक्रिया