काठमाडौं । प्रधानन्यायाधीश चोलेन्द्रशमशेर जबरालाई सर्वोच्च अदालतको गेटमै रोक्ने घोषणा गरेको नेपाल बार आवद्ध आन्दोलकारी कानुन व्यवसायीहरुलाई नै सर्वोच्च प्रवेशमा रोक लगाईएको छ । कडा सुरक्षा सहित सर्वोच्चको गेट बन्द गरिएपछि आन्दोलनरत कानुन व्यवसायीहरु नेपाल बार एसोसियनको केन्द्रीय कार्यालयमा धर्ना सुरु गरेका छन् ।
सुरक्षाकर्मीले आन्दोलनकारीलाई सर्वोच्च अदालत प्रवेशमा रोक लगाउँदै अदालतको गेटमै तैनाथी बढाएको हो । बारको टोली सर्वोच्च अदालत जाने कार्यक्रम रहे पनि गेट बन्द गरिएको छ । सुरक्षा घेरा छिचोलेर भएपनि सर्वोच्चमा धर्ना दिइने अधिवक्ता ओमप्रकाश अर्यालले बताए । ‘गिरफ्तारी हुनुपरे पनि तयार छौँ, तर आन्दोलन जारी रहन्छ,’ उनले भने ।
सर्वोच्च क्षेत्रमा बिहानैदेखि ठूलो संख्यामा नेपाल प्रहरी परिचालन गरिएकोमा अहिले सशस्त्र प्रहरी पनि परिचालन भएको छ । सामान्यतया सर्वोच्च परिसरको सुरक्षाको जिम्मा सर्वोच्च अदालत सुरक्षा गणले लिएको छ । तर, सुरक्षा संवेदनशीलता भन्दै हाल सुरक्षाको व्यवस्थापन नेपाल प्रहरीको काठमाडौं परिसरले गरिरहेको छ । सामान्य अवस्थामा प्रहरी मात्र परिचालन हुने गरेकामा आज सशस्त्र प्रहरी पनि परिचालन गरिएको छ ।
प्रतिक्रिया