काठमाडौं । प्रदेश १ का मुख्यमन्त्री राजेन्द्र राईले विश्वासको मत प्राप्त गरेका छन् ।
प्रदेशसभाको आजको बैठकमा भएको मतदानमा मुख्यमन्त्री राईले मागेको विश्वासको मतको पक्षमा ५० मत परेको छ । विपक्षमा २९ मत परेको छ ।
मतदानपछि सभामुख प्रदीपकुमार भण्डारीले प्रदेशसभामा तत्काल कायम रहेका सदस्यको बहुमत प्राप्त भएकोले राईले विश्वासको मत पाएको घोषणा गरे ।
राईलाई गठबन्धनका उनको दल नेकपा एकीकृत समाजवादी, नेपाली कांग्रेस, माओवादी केन्द्र, जनता समाजवादी पार्टी र संघीय लोकतान्त्रिक राष्ट्रिय मञ्चको समर्थन रहेको थियो ।
९२ सदस्यीय प्रदेशसभामा बहुमतका लागि ४७ मत आवश्यक पर्छ । प्रदेशसभामा एमालेमा ४१, कांग्रेसका २१, माओवादी केन्द्रका १५, नेकपा (एकीकृत समाजवादी)का १०, जसपाका ३ र संघीय लोकतान्त्रिक मञ्चका १ र राप्रपाका १ सांसद छन् ।
गत १५ कात्तिकमा भीम आचार्यले मुख्यमन्त्रीबाट राजीनामा दिएपछि १६ कात्तिक राईले मुख्यमन्त्रीमा नियुक्त भएर पद तथा गोपनीयताको शपथसहित पदभार ग्रहण गरेका थिए ।
मुख्यमन्त्री राईले विश्वासको मत हासिल गरे पछि सभामुख भण्डारीले प्रदेशसभा बैठक अनिश्चितकालका लागि स्थगित गरेका छन् ।
प्रतिक्रिया