काठमाडौं । नेपाली कांग्रेसको १४औं महाधिवेशनमा संस्थापन इतर समुहको दोस्रो उम्मेदवारकारुपमा नेता शेखर कोइरालाले पनि सभापति पदमा उम्मेदवारी घोषणा गरेका छन् । प्रकाशमान सिंहले आफ्नो अडान नछाडेपछि रामचन्द्र पौडेल पक्षले सभापति पदका लागि शेखर कोइरालालाई आधिकारिक उम्मेदवार बनाएको हो । पौडेल पक्षको शनिबार बसेको बैठकले कोइरालालाई आधिकारिक उम्मेदवारको रुपमा टुंगो लगाएको हो ।
पौडेलपक्षबाट उपसभापतिका लागि महेश आचार्यलाई उम्मेदार बनाउने निर्णय गरिएको छ भने महामन्त्री पदमा गगन थापाको नाम प्रस्ताव गरिएको छ । अर्को महामन्त्रीमा मिनेन्द्र रिजाल वा विश्वप्रकाश शर्मामध्ये एकलाई आधिकारी उम्मेदवार बनाउने गृहकार्य भइरहेको पौडेल समूह निकट स्रोतले जनाएको छ ।
नेता पौडेलले आफ्नो पक्षबाट शेखर कोइरालालाई सभापतिका लागि आधिकारिक उम्मेदवारको रुपमा उभ्याएको भन्दै विज्ञप्ति समेत सार्वजनिक गरिसकेका छन् ।
कांग्रेस विधानमा १ सभापति, २ उपसभापति, २ महामन्त्री, ८ सहमहामन्त्री निर्वाचित हुने र १ जना कोषाध्यक्ष मनोनित गरी १४ जना पदाधिकारी रहने व्यवस्था गरिएको छ ।
केन्द्रीय सदस्यहरू खुलातर्फ ३५ जना, विभिन्न समावेशी समूह र पिछडिएको क्षेत्रतर्फ ६५ जना र ७ प्रदेशबाट १र१ महिलासहित २१ जना आउने छन् ।
प्रतिक्रिया