काठमाडौं । अर्थमन्त्री जनार्दन शर्माले विद्युत बिक्रीभन्दा खपत गर्नुपर्ने नीति लिनुपर्ने बताएका छन् । बधुबार नेपाल उद्योग वाणिज्य महासंघले गरेको नव उत्थान सम्मेलनको उद्घाटन कार्यक्रमलाई सम्बोधन गर्दै अर्थमन्त्री शर्माले विद्युत बिक्री गरेर व्यापार घाटा कम नहुने बताए ।
उनले विद्युत खपत गरी वस्तु उत्पादन र रोजगारी सृष्टि गरेर मात्र व्यापार घाटा कम गर्न सकिने स्पष्ट पार्दै विद्युत महसुल घटाएर भएपनि उत्पादन गर्ने उद्योगहरूलाई उपलब्ध गराउनुपर्ने बताए । ‘अहिले विद्युत बिक्री गर्नुपर्ने भन्दै प्राधिकरण चिन्तामा छ । विद्युत बिक्रीबाट अर्थतन्त्र बलियो हुँदैन, अर्थतन्त्र बलियो यो बनाउन बिक्रीभन्दा पनि उत्पादनशील उद्योगहरूलाई सहुलियतमा विद्युत उपलब्ध गराएर खपत बढाउनु पर्छ ।’ उनले भने, -‘विद्युत उद्योगलाई नदिने अनि खेर फाल्ने किसिमको नीतिलाई सरकारले सच्याउँछ ।’
नीति परिमार्जन गर्ने बारे मन्त्रालय र सम्बन्धित निकायसँग छलफल भइरहेको जानकारी दिँदै मन्त्री शर्माले परिमार्जित नीति आगामी आर्थिक वर्षमा समेटिने समेत उल्लेख गरे ।
उनले कुन उद्योगलाई कहाँ कति विद्युत उपलब्ध गराउनुपर्ने हो त्यसको यथेष्ट तथ्याङ्क बनाएर विद्युत उपलब्ध गराउनुपर्ने बताए । विशेषगरी उत्पादन गरेर निर्यात गर्न सक्ने किसिमको उद्योगलाई प्राथमिकतामा राखेर विद्युत सहुलियतमा उपलब्ध गराउनुपर्नेमा अर्थमन्त्री शर्माको जोड दिएका छन् । यसले मुलुकलाई उत्पादनुमुखी अर्थतन्त्र निर्माणमा टेवा पु¥याउने उनले विश्वास व्यक्त गरे ।
उनले निजी क्षेत्रले मुलुकको ग्राहस्थ उत्पादनमा ठूलो योगदान गरिरहेको स्मरण गर्दै निजी क्षेत्रकै सुझावअनुसार आगामी नीति तय गरिने पनि उनले बताए ।
प्रतिक्रिया