संखुवासभा । संखुवासभाको खाँदबारी नगरपालिका-१ बसपार्कमा बेवारिसे अवस्थामा रहेको रुद्राक्ष च्याप्ने क्लिप र अवैध औषधि प्रहरीले बरामद गरेको छ ।
खाँदबारीको बसपार्क नजिकै सडकको किनारमा छोडिएको अवस्थामा रुद्राक्ष च्याप्ने क्लिप र अवैध औषधी फेला परेको जिल्ला प्रहरी कार्यालय सङ्खसवासभाका प्रहरी निरिक्षक शुभेष अधिकारीले जानकारी दिए ।
प्रहरी निरीक्षक अधिकारीका अनुसार प्रहरीको नियमित गस्तिको क्रममा सडक छेउमा थुपारिएको बोरा खोलेर हेर्दा विभिन्न सामग्रीहरु फेला परेको बताए ।
मंगलबार बिहान सडक छेउमा राखिएको बोरा भित्र ९ हजार ५ सय २० थान रुद्राक्ष च्याप्ने क्लिप, कृषि बालीमा लगाउने पिबिओजी नामको औषधी १ सय १६ प्याकेट, केएचटुपिओ नामको औषधी १५ प्याकेट, सिलिलोङ नामको औषधी २० बोतल र वाटर पम्प लेखिएको औजार एक थान फेला परेको हो । चेप्टो र चिल्लो रुद्राक्षको दाना चिचियाँ ब्यापारीहरुको रोजाईमा पर्दै आएको छ ।
सवै सामग्री भन्सार छलेर ल्याइएको हुन सक्ने प्रहरीले जनाएको छ । उक्त सामान हालसम्म कोही पनि दाबी गर्न नआएको जिल्ला प्रहरी कार्यालय संखुवासभाले जनाएको छ ।
बरामद भएको सामान राजश्व अनुसन्धान कार्यालय इटहरी पठाईएको प्रहरी निरिषक अधिकारीले बताए । पछिल्लो समय रुद्राक्षको आकार परिवर्तन गर्नका लागि फल्दै गरेको दानामा क्लिप लगाईदै आएको छ ।
क्लिपले तल्लो र माथिल्लो भागबाट च्यापिदिएपछि सामान्यतया चेप्टो आकारको दाना निस्किेने गरेको छ । त्यस्तै, रुद्राक्षको दानालाई चिल्लो बनाउनका लागि विभिन्न औषधीहरु छर्किने गरिएको छ ।
प्रतिक्रिया