बुटवल । रुपन्देहीको देवदह नगरपालिकाको घोडाहा जंगलमा मंगलबार दिउँसो २ जनाको शव फेला परेको छ ।
पूर्वपश्चिम राजमार्गस्थित रुपन्देहीको देवदह नगरपालिकामा पर्ने बुद्दनगर सामुदायिक वन घोडाहा ९ मा शव फेला परेको हो ।
अन्दाजी ३५ वर्षीया महिलासँगै अन्दाजी ६ वर्षको बालिका मृत अवस्थामा भेटिएको जिल्ला प्रहरी कार्यालय रुपन्देहीका सहायक प्रवक्ता भास्कर चन्दले बताए ।
मधेशी मूलको जस्तो देखिने उनीहरुको शव फेला परेसँगै आवश्यक अनुसन्धान अघि बढाइएको चन्दले बताए ।
शवको प्रकृति हेर्दा बालिकाको घांटी रेटेर हत्या गरेर फालिएको हुन सक्ने इलाका प्रहरी कार्यालय देवदहका प्रमुख प्रहरी निरीक्षक गंगा सारुले जानकारी दिए ।
शवको पहिचान हुन नसकेको र घटनाको अनुसन्धान भइरहेको उनले बताए । उनीहरु आमाछोरी हुन सक्ने प्रहरीको अनुमान छ ।
घटनास्थलमा इलाका प्रहरी कार्यालय बुटवल र देवदह प्रहरी चौकीबाट खटिएको टोलीले घटना बारे थप अनुसन्धानलाई अघि बढाएको छ ।
प्रतिक्रिया