काठमाडौं । नेपालका लागि पाकिस्तानका राजदूत सैयद हैदर शाहले पूर्वप्रधानमन्त्री एवं नेकपा एकीकृत समाजवादीका अध्यक्ष माधवकुमार नेपालसँग शिष्टाचार भेट गरेका छन् ।
राजदूत शाहले सोमबार साँझ नेता नेपाल निवास कोटेश्वर पुगेर उनीसँग भेट गरेका हुन् । भेटका अवसरमा दुई देशबीचको सम्बन्ध थप सुदृढ बनाउने विषयमा छलफल भएको छ । अध्यक्ष नेपालले नेपाल र पाकिस्तानबीच लामो समयदेखि समधुर सम्बन्ध रहँदै आएको बताउँदै थप सम्बन्ध विस्तारका लागि प्रयास गर्नुपर्ने बताएका थिए ।
नेपाल–पाकिस्तान द्विपक्षीय सम्बन्धलाई सुदृढ बनाउने सन्दर्भमा राजनीतिक नेतृत्वसँगका शिष्टाचार भेटघाटलाई दिइएको निरन्तरताको एक प्रयास भएको पाकिस्तानी दूतावासले जनाएको छ । त्यसअवसरमा राजदूत शाहले प्रधानमन्त्रीको हैसियतमा एवं राजनीतिक दलको शीर्ष नेताको हैसियतमा द्विपक्षीय सम्बन्धलाई अगाडि बढाउनमा सराहनीय योगदान गरेको भन्दै अध्यक्ष नेपालको प्रशंसा गरेका थिए। उनले नेपाल र पाकिस्तानबीचको सुमधुर सम्बन्धलाई सुमधुर बनाउनका लागि अध्यक्ष नेपालले आफ्नो योगदानलाई अझ निरन्तरता दिने विश्वास पनि व्यक्त गरेका थिए ।
यसअघि राजदूत शाहले आइतबार नेकपा एमालेका अध्यक्ष केपी शर्मा ओलीसँग शिष्टाचार भेटवार्ता गरेका थिए ।
प्रतिक्रिया