काठमाडौं । भारतीतका प्रधानमन्त्री नरेन्द्र मोदीले नेपाल र भारतबीचको सम्बन्ध अतुल्य रहेको बताएका छन् ।
शनिबार नयाँदिल्लीस्थित हैदराबाद हाउसमा आयोजित प्रधानमन्त्री शेरबहादुर देउवासहितको संयुक्त पत्रकार सम्मेलनमा भारतीय प्रधानमन्त्री मोदीले दुई देशबीचको जस्तो सम्बन्ध अन्त कतै नपाइने बताएका हुन् । मोदीले सभ्यता, संस्कृति र आदानप्रदानको धागो प्राचीन कालबाटै जोडिएको बताउँदै भने, ‘भारत र नेपालबीचको मित्रता, हाम्रा नागरिकबीचको सम्बन्धजस्तो उदाहरण विश्वमै कहीँ देख्न पाइँदैन ।’
मोदीले नेपालको शान्ति, प्रगति र शान्तिको यात्रामा भारत दृढ साथी रहेको बताए । मोदीले नेपालले आफूलाई बढी भएको विद्युत् भारतलाई बेच्न पाउनु खुुसीको कुरा रहेको बताए । उनले प्रधानमन्त्री देउवासँग भएको भेटमा पञ्चेश्वर परियोजनालाई तीव्र गतिमा अघि बढाउने सहमति भएको जनाए ।
मोदीले खुला सीमाबाट हुनसक्ने अवाञ्छित गतिविधि नियन्त्रण लागि दुई देशका सुरक्षा निकायबीच सहकार्य गर्ने सहमति भएको पनि जनाए ।
प्रतिक्रिया