स्थानीय तहको निर्वाचनका लागि आजबाट उम्मेदवारी दर्ता

काठमाडौं । स्थानीय तहको निर्वाचनका लागि निर्वाचन आयोगले आजबाट उम्मेदवारी दर्ता गर्ने भएको छ ।

स्थानीय तहको चुनावको पहिलो चरणको तयारी पूरा भएको आयोगले जनाएको छ । आजबाट दोस्रो चरणअन्तर्गत उम्मेदवारी दर्ता गरिने आयोगका प्रवक्ता शालिग्राम शर्मा पौडेलले बताए ।

आज बिहान १० बजे अपराह्न ५ बजेसम्म र सोमबार बिहान १० बजे अपराह्न ५ बजेसम्म मुख्य निर्वाचन अधिकृत र निर्वाचन अधिकृत कार्यालयमा उम्मेदवारी दर्ता गर्न सकिनेछ । गत निर्वाचनमा एकै दिन उम्मेदवारी दर्ता गर्न अप्ठ्यारो भएपछि यस पटक दुई दिनको समय तोकिएको आयोगका प्रवक्ता पौडेलले बताए ।

देशका ७५३ वटै स्थानीय तहमा मुख्य निर्वाचन अधिकृत तथा निर्वाचन अधिकृतको कार्यालय स्थापना भई कार्यसञ्चालन गरिसकेको छ । मुख्य निर्वाचन अधिकृत तथा निर्वाचन अधिकृतको कार्यालयमा उम्मेदवारी दर्ता गर्न सकिनेछ ।

यससँगै आयोगले मतदान केन्द्रमा प्रयोग हुने सामग्री पठाउने कार्य निरन्तर भइरहेको जनाएको छ । भोलि अपारह्न ५ बजेपछि मनोनयनपत्र दर्ता भएको उम्मेदवारको सूची प्रकाशन गर्ने गरिने कार्यक्रम छ ।

त्यस्तै, वैशाख १३ गते उम्मेदवारको विरोधमा उजुरी दिने समय तोकिएको छ । त्यसपछि वैशाख १४ र १५ गते मनोनयनपत्र जाँच गर्ने तथा उजुरीउपर जाँचबुझ गरी निर्णय गर्ने आयोगले जनाएको छ ।

वैशाख १५ गते मनोनयन भएको उम्मेदवारको नामावली प्रकाशन गर्ने र वैशाख १६ गते उम्मेदवारले नाम फिर्ता लिने कार्यक्रम तय गरिएको छ । त्यसपछि वैशाख १७ गते उम्मेदवारको अन्तिम नामावली प्रकाशन गर्ने र उम्मेदवारलाई निर्वाचन चिह्न प्रदान गरिने भएको छ । त्यसपछि वैशाख ३० गते मतदात हुनेछ ।

शान्तिपूर्ण रुपमा उम्मेदवारी दर्ता गर्न सहयोग गर्न आयोगले सबै उम्मेदवार र दलहरुलाई आग्रह गरेको छ ।