बुटवल । बुटवल उपमहानगरपालिका वडा नम्बर १२ मा वडा अध्यक्षमा एमाले उम्मेदवारले प्रयोग गरिरहेका गाडी तोडफोड भएको छ । बुटवल १२ नयाँगाउँ चोकमा ६१८३ नम्बरको स्कुटरमा आएका तिनजनाको समुहले बुटवल उपमहानगरपालिका वडा नम्बर १२ का वडा अध्यक्षका एमाले उम्मेदवार देवी रेग्मीले प्रयोग गरिरहेको बा २० च ६७८५ नम्बर को ईसुजुको डबल क्याप गाडी सोमबार साँझ ८ बजेतिर तोडफोड गरेको बताइएको छ ।
स्कुटरमा सवार ३ जनाको समूहले एकाएक गाडीमाथी ढुंगा प्रहार गरेर फरार भएको स्थानीयबासीले बताएकाछन् । उनिहरुको ढुंगा प्रहारबाट गाडीको अगाडीको शिशा फुटेको छ। आक्रमणपछि गाडीलाई प्रहरीले सुरक्षामा राखेको छ भने आक्रमणमा संलग्नहरु फरार रहेको प्रहरीले जनाएको छ।
प्रचारमा प्रयोग भइरहेको सो गाडी नेपाली कांग्रेसका कार्यकर्ताहरुले तोडफोड गरेको नेकपा एमालेले जनाएको छ । एमाले प्रचार विभागका प्रमुख डीआर घिमिरेले गाडीमाथको आक्रमण कांग्रेस कार्यकर्ताहरुले गरेको आरोप लगाएका छन् । उनले समाजिक सञ्जालमा हार्ने निश्चित भएपछि कांग्रेस कार्यकर्ताहरु आक्रमणमा उत्रिएको लेखेका छन् ।
ईलाका प्रहरी कार्यालय रुपन्देहीका प्रमुख नायव प्रहरी उपरिक्षक ठगबहादुर केसीले घटना घटेको जानकारी आएको र घटनास्थलमा तत्काल प्रहरी परिचालन गरि अनुसन्धान थालिएको जानकारी दिए ।
बुटवलमा कांग्रेसबाट मेयरपदका उम्मेदवार खेलराज पाण्डेले घटनाका विषयमा आफुलाई जानकारी नभएको बताए । दिनभरीको घरदैलोपछि साँझ अबेर घर पुगेको र सबैतिरको खबर बुझ्दै गरेको जनाउँदै उनले नयाँगाउको घटनाबारे आफुलाई थाहा नभएको बताए ।
प्रतिक्रिया