एभरेष्टमा दुई दिने आँखा शिविर सम्पन्न

बुटवल । बुटवल-८ सुख्खानगरमा रहेको एभरेष्ट ईङ्गलिस माध्यमिक विद्यालयका विद्यार्थीहरुका लागि राखिएको दुई दिने निःशुल्क आँखा शिविर सम्पन्न भएको छ ।

एभरेष्टका कक्षा एकदेखि दश कक्षासम्मका विद्यार्थीलाई केन्द्रीत गरि राखिएको आँखा शिविरमा विद्यार्थीको सामान्य आखाँ परिक्षण, दुर, अदुर दृष्टि दोष लगायतका रोगको परीक्षण गरिएको विद्यालयका सहायक प्रिन्सिपल भिमसेन गौतमले जानकारी दिए ।

बुटवल लायन्स आँखा अस्पतालको प्राविधिक सहयोग तथा एभरेष्ट स्कुलको संयोजनमा भएको उक्त आँखा शिविरमा एक हजार सात सय विद्यार्थीहरुको आँखा परीक्षण गरिएको थियो । लायन्स आँखा अस्पतालका सहायक नेत्र विशेषज्ञ धमयन्ती राना, लक्ष्मी चौधरी, शिक्षा आचार्य, निकिता भट्टराई, निरञ्जन चौधरी, विनोद चौधरी, गंगाबहादुर बुढा लगायतको टोलीले विद्यार्थीहरुको आँखा परीक्षण गरेको थियो ।

आँखा परीक्षण शिविरमा ५० जना विद्यार्थीहरुमा दृष्टिदोष देखिएको र बाँकी सबैको अवस्था सामान्य रहेको विद्यालयका प्रिन्सिपल कृष्ण न्यौपानेले जानकारी दिए । विद्यालयमा अध्ययन गर्ने विद्यार्थीको स्वास्थ्यबारे सचेतना बाढ्न तथा स्वास्थोपचारमा सघाउ पुर्याउनका लागि आँखा लगायतका शिविरको आयोजना गर्दै आएको उनले बताए ।