काठमाडौं । जल तथा मौसम विभागले आज देशैभरको मौसम खुल्ने सम्भावना न्यून रहेको अनुमान गरेको छ । तीनवटा वायु प्रणाली सक्रिय हुँदा मौसम खुल्ने सम्भावना न्यून रहेको विभागकी मौसमविद् प्रतिभा मानन्धरले बताइन् ।
विभागले शनिबार गरेको मौसम पूर्वानुमानले आज मौसम बदली रहने अनुमान गरेको थियो । “हिजोभन्दा आज मौसम खराब हुन्छ भनेर हिजो पनि भनेका थियौँ । आज दिनभरि मौसम खुल्ने सम्भावना न्यून छ,” मौसमविद् मानन्धरले भनिन् ।
खराब मौसमकै कारण आज बिहान पोखराबाट जोमसोमतर्फ जाँदै गरेको जहाज सम्पर्कविहीन बनेको छ । उक्त क्षेत्रमा पनि आज दिनभरि मौसम खुल्ने सम्भावना नरहेको विभागले जनाएको छ । विभागका अनुसार आज दिउँसो र रातिको समयमा हल्कादेखि मध्यम वर्षाको सम्भावना रहेको छ । बिहान पनि जहाज घटना भएको क्षेत्र र सुदूरपश्चिम, भैरहवालगायत तराईका क्षेत्रहरूमा वर्षा भइरहेको देखाएको थियो ।
तीनवटा न्यूनचापीय प्रणाली सक्रिय हुँदा देशैभर वर्षा भइरहेको अवस्था हो । यसै पनि मनसुन सिजन सक्रिय हुने समय नजिकिएसँगै त्यसको प्रभाव पनि पर्न गएको विभागले जनाएको छ । मानन्धरका अनुसार मनसुन सिजन जुन ८ देखि मनिटरिङ हुन्छ । नेपालमा जुन १३ मा मनसुन भित्रिने गर्छ । भोलि र पर्सि भने मौसम खुल्दै जाने विभागको पूर्वानुमान छ ।
प्रतिक्रिया