काठमाडौं । पाँच दलीय सत्ता गठबन्धनले स्थानीय तह निर्वाचनको परिणाम सन्तोषजनक भएको निष्कर्ष निकालेको छ ।
प्रधानमन्त्रीको सरकारी निवास बालुवाटारमा नेपाली कांग्रेस, नेकपा माओवादी केन्द्र, नेकपा एकीकृत समाजवादी, जसपा र राष्टिय जनमोर्चा आबद्ध पाँच दलीय सत्ता गठबन्धनका शीर्ष तहका नेताहरूको सोमबार बसेको बैठकले स्थानीय तहमा गठबन्धनबीच भएको चुनावी तालमेल उपलब्धिमूलक रहेको निष्कर्ष निकालेको हो ।
बैठकमा सहभागी कांग्रेस वरिष्ठ नेता रामचन्द्र पौडेलले बैठकमा स्थानीय तह निर्वाचनको परिणामको समीक्षा भएको जानकारी दिए ।
‘बैठकमा चुनावी समीक्षा भयो, गठबन्धनबीचमा तलैसम्म सबै स्थानीय तहमा तालमेल नहुँदा सोचेजस्तो परिणाम आएन भन्ने निष्कर्ष हो तर पनि परिणाम सन्तोषजनक, उपलब्धिमूलक छ भन्ने छ,’ कांग्रेस वरिष्ठ नेता पौडेलले राजधानीसँग भने ।
बैठकले पालिका कार्यसमिति र जिल्ला समन्वय समिति बनाउँदा पनि गठबन्धन आबद्ध पाँच दलभित्र सहमति गरेर जान जिल्ला तहका नेतृत्वलाई निर्देशन दिएको छ ।
नेता पौडेलले गठबन्धन आबद्ध जिल्ला तहका नेतृत्वलाई पालिका कार्यसमिति र जिल्ला समन्वय समिति बनाउँदा सहमतिका साथ अघि बढ्न निर्देशन गरिएको जानकारी दिएका हुन् ।
पौडेलका अनुसार सो निर्देशन कार्यान्वयनका लागि पाँचौं दलले आ-आफ्नो दलका प्रदेश र जिल्ला समितिलाई निर्देशन दिनेसमेत प्रतिबद्धता जनाएका छन् ।
राष्टिय जनमोर्चाकी उपाध्यक्ष दुर्गा पौडेलले स्थानीय तह निर्वाचनमा पाँच दलीय गठबन्धनबीचको चुनावी तालमेलको निर्णय सबै स्थानीय तहमा कार्यान्वयन नभए पनि गठबन्धनबीचको तालमेल मूलभूत रूपमा सफल भएको बताइन् ।
उनले आगामी प्रदेश सभा र प्रतिनिधि सभाको निर्वाचनमा पनि सत्ता गठबन्धनबीचमा चुनावी तालमेलको आधार तय भएको ’ बैठकमा नेताहरूबाट धारणा आएको जानकारी दिइन् ।
‘स्थानीय तहमा भएको चुनावी तालमेलले प्रदेश र प्रतिनिधि सभाको निर्वाचनमा पनि चुनावी तालमेलका लागि आधार तयार गरेको ’bout नेताहरूबाट धारणा आएको छ,’ पौडेलले भनिन् ।
सत्तारूढ दलबीचमा देशभरका ७ सय ५३ पालिकामध्ये २ सय ९ पालिकामा चुनावी तालमेल भएको थियो । मुख्य गरी महानगर र उपमहानगरमा गठबन्धन आबद्ध दलहरूले तालमेललाई कसिलो बनाएका थिए ।
देशभरका ७ सय ५२ पालिकाको अन्तिम नजिता आउँदा गठबन्धनमा आबद्ध प्रमुख घटक कांग्रेसले ३ सय २९, माओवादीले १ सय २१, जसपाले ३०, एकीकृत समाजवादीले २० र जनमोर्चाले दुई पालिका प्रमुख जितेका छन् ।आजको राजधानी दैनिकमा महेश्वर गौतमले यो समाचार लेखेका छन ।
प्रतिक्रिया