बुटवल । रुपन्देही व्यापार संघ व्याग बस्तुगत उपसमितिले बुटवल उपमहानगरपालिका वडा नं. ११ मा रहेको नेपाल अपाङ्ग आश्रमलाई खाद्यन्न सामाग्री प्रदान गरेको छ ।
उपसमितिको पहलमा संकलन गरिएको खाद्य सामाग्री कार्यक्रमका प्रमुख अतिथि बुटवल उपमहानगरपालिकाका उपप्रमुख सावित्रा अर्याल तथा रुपन्देही व्यापार संघका अध्यक्ष कृष्णप्रसाद घिमिरेले संयुक्त रुपमा आश्रमका व्यवस्थापक डोल बहादुर रामदामलाई हस्तान्तरण गरे ।
सो अवसरमा बोल्दै बुटवल उपमहानगरपालिकाका उपप्रमुख अर्यालले समाजमा रहेका हरेक नागरिकको बाच्न पाउने अधिकारलाई सुरक्षित गर्दै उनीहरुको श्रम र शिपलाई सदुपयोग गर्ने अवसरको सिजर्ना गर्न सबैले हालेमालो गर्नु पर्ने कुरामा जोड दिईन् । उनले समाजमा विभिन्न कारण अशक्त हुन पुगेका नागरिकहरुको सुरक्षामा उपमहानगरपालिकाले समान व्यवहार गर्ने प्रतिवद्धता व्यक्त गर्दै अपहेलित हुने अवस्था आउन नदिने बताईन् ।
कार्यक्रमका विशिष्ठ अतिथि रुपन्देही व्यापार संघका अध्यक्ष कृष्णप्रसाद घिमिरेले संघले व्यवसायीक अधिकारको वकालतसंगै समाजप्रतिको उत्तरदायित्वलाई पनि आफ्नो लक्ष्य राखेको हुदा यस प्रकार सामाजिक कार्यलाई निरन्तरता दिदै आएको बताए ।
व्याग बस्तुगत उपसमितिका संयोजक शंकर पोखरेलको अध्यक्षता सहसंयोजक विजयसिंह रायमाझीको स्वागत तथा सचिव दिपेन्द्र न्यौपानेको सञ्चालनमा भएको कार्यक्रममा आश्रमका व्यवस्थापक डोल बहादुर रामदामले आश्रमको अवस्थाका बारेमा जानकारी गराएका थिए ।
कार्यक्रममा संघका प्रथम उपाध्यक्ष प्रकाश ढकाल, महासचिव दयानिधी भण्डारी, कोषाध्यक्ष नामदेव पाण्डे, सचिव फर्सुराम पन्थ लगायतका व्यवसायीहरुको उपश्थिति रहेको थियो ।
सो अवसरमा करिव २५ हजार मुल्य बराबरको चामल, तेल, दाल, आलु, प्याज, साबुन लगायतको सामाग्री प्रदान गरिएको थियो ।
प्रतिक्रिया